Sikkim CM-in Bimal Gurung a hum : West Bengal Minister

West Bengal Tourism Minister Goutam Deb chuan Sikkim Chief Minister Pawan Kumar Chamling chu Gorkha Janmukti Morcha (GJM) chief Bimal Gurung humah a puh.

West Bengal Minister chuan,"Sikkim Chief Minister hian Bimal Gurung himna tur hian hma a la a, man a nih lohna turin a hum a ni" a ti. Gurung-a hi Unlawful Activities (Prevention) Act tlawhchhanin man tuma zawn mek a nih thu sawiin, Bengal police-te chuan kar liam ta khan Sikkim an pan mah se tun thlengin man a la ni lo. Hemi avang hian Sikkim sorkar chu inrawlhah a puh a ni. Hetih lai hian Bengal Police-te'n Sikkim an luh tur chungchangah Sikkim police-te hriattirna an pe lo anga sawi chu thudik lo niin a sawi bawk.

Minister Goutam Deb chuan Sikkim Police-te chu Gurung-a man duh loah a puh bawk a, a tlan­chhuahna tur kawng an hawnsak niin a sawi. Sikkim sorkar chetdan chu an enliam mai dawn lo tih sawiin, West Bengal sorkar chuan dan angin an lakah hma a la dawn tih a sawi.

Sikkim Chief Minister Chamling hian GJM-ten West Bengal state aṭanga inlakhran phuta nawrh an huaihawt chungchangah hian GJM-te hma lakna chu a thlawp thu a lo sawi tawh a ni. A thlawp thu hi Chamling chuan sorkar laipuiah ziakin a thlen a, Gokhaland a pian ngei theih nan hma a la ni. Sikkim Assembly-ah pawh hemi chungchang hi ṭum hnih ngawt sawichhuah a ni tawh niin, Goutam Deb chuan a sawi bawk.

Deb chuan Bengal chu Sikkim tana state pawi­mawh tak a nih thu hrenawn fo turin Chamling chu a duh thu a sawi bawk.