Manipur CM hlui lakah FIR thehlut

Manipur Chief Minister O Ibobi Singh chu Manipur Development Society (MDS) hnuaia sum tichingpenah puh a ni a, a lakah thubuai thehluh a ni. A rual hian bureaucrat panga te lakah pawh thubuai ziahluh a ni bawk.

Kar kalta Zirtawpni khan Imphal police sta­tion-ah thubuai hi thehluh a ni a, CM hlui Ibobi Singh, chief secretary hlui pathum - Y Ningthem Singh, P C Lawmkunga leh O Nabakishore Singh bakah, MDS-a project director hlui D S Poonia leh administrative officer Ranjit Singh-te chu sum tichingpenah puh an ni. Anni bakah hian Planning department-a joint secretary Th Munindra Singh-a hming pawh lam rik a ni a, Imphal West Superintendent of Police chuan he thil hi chhui nghal a nih thu a sawi.

O Ibobi Singh hi MDS-ah hian July 1, 2013 - August 31, 2014 chhung chairman a ni a, hetih hun chhung hian cheng vaibelchhe 185.79 vel tihchingpen a awm nia tarlan a ni. Hemi chungchangah hian nikum November thla khan Planning Department chuan Vigi­lance department chu chhui chiang turin a ngen a, he thil kal zelah hian sorkara mi challang tak tak hming pawh lam rik a ni. Manipur Pradesh Congress Committee thupuangtu A K Ranjit chuan chief minister hlui O Ibobi Singh-a laka thubuai ziahluh hi an pawm thu sawiin, thudik hailan ngei an phut thu an sawi. Congress party bakah hian party dang pahnih pawhin he thubuai chhui zui tura sorkar hmalakna chu an thlawp thu an sawi bawk.