Tripura-ah Covid-19 kai mi 29 awm tawh

Tripura-ah Thawhṭanni khan coronavirus kai thar mi 13 hmuh belh leh an ni a, heng mite nen hian Tripura-a hri kai hmuh zat hi mi 29 an tling tawh a ni. 

Covid-19 kai hmuh hmasak pahnihte enkawl dam an nih hnuin, kar khat liam ta khan chief minister Biplab Kumar Deb chuan an state chu coronavirus vei awm lohnaah a lo puang tawh a ni. Mahse hemi hnu, Inrinni khan Dhalai district-a Ambassa unit-a BSF sipai pahnihin he hri hi an kai tih hriat a ni leh a,  Pathianni khan an awmna unit-a sipai dang 12 an kai tih hriat belh leh a ni. 

Thawhṭanni zan khan mi 13 in hri hi an kai tih hriat leh niin, hengte hi BSF sipaite bakah sipai fa naupang pahnih an ni. Hri kai hriat tharte pawh hi Ambassa unit-a awmte vek an ni. 

Dhalai district-a hri vei hmuh an ni leh tak avangin nimin aṭang khan he district hi red zone-ah puan zui nghal a ni.