Meghalaya : MDA sorkar aṭangin BJP inhnukdawk maithei

Meghalaya-a BJP hruaitu leh minister hlui, Alexander L.Hek chuan National People's Party (NPP) kaihhruai Meghalaya Democratic Alliance (MDA) sorkar aṭangin BJP chu a inhnukdawk maithei tih a sawi.

Party-tena ṭangrual sorkar siam, MDA sorkarah hian BJP hian MLA pahnih an nei a ni.

Hek chuan chief minister Conrad K Sangma kaihhruai, MDA sorkar thlawpna hnuhdawh chu a hun tawh nia a ngaih thu a sawi a, an duhdan hi central lama party hruaitute hnenah pawh an thleng tawh tih a sawi.

MDA sorkarin a term, kum nga a hman tlin dawn hnaiha ṭangrual sorkar thlawpna hnuhdawh an duhna chhan chu a hun takah an la pholang dawn tih a sawi nghal bawk.

Hemi hma hian BJP national vice-president leh party Meghalaya in-charge M.Chuba Ao pawhin MDA sorkar an thlawpna hi hnuhdawh a nih thuai theih thu a lo sawi tawh bawk. Ao chuan state sorkar eirua puhna hrang hrangte chu an party chuan an zirchiang mek tih sawiin, lehkha pawimawhte an neih kim hunah Central Bureau of Investigation (CBI) kutah hlan a ni ang, a ti.

Hetih lai hian NPP Rajya Sabha leh state president W.R.Kharlukhi chuan BJP vauna chu thil lem niin a puh thung. NPP president, CM ni bawk Sangma pawhin Ao thusawi chu a mimal ngaihdan mai anih thu leh, BJP official thuchhuah a ni lo tih a sawi bawk.

NPP hi BJP kaihhruai North East Democratic Alliance (NEDA) leh National Democratic Alliance (NDA)-ah BJP thawhpui pawimawh tak an ni. Meghalaya-a ṭangrual sorkar hnuaia kum nga dawn lo thawkdun tawh mah se ,tun hnaiah party pahnihte inkar hi a ṭha vak lo a ni. West Garo Hills district-a a farmhouse-a nawhchizawrhna hmun siamah puh, state BJP vice president Bernard N.Marak man a nih hnuah an inkar hi a chhe zual a ni.