Hamro Sikkim Party President atan Bhaichung Bhutia thlang

Hamro Sikkim Party (HSP) working president Bhaichung Bhutia chu party executive chuan lungrual takin an party president atan an thlang.

Kum 2018-a HSP din a nih aṭang khan Dr Bina Basnet chu founding president-ah a awm a. President term hi a tirah kum khat zel atan ti mah se, kum nga term turin an thlak leh a ni. Dr Bina Basnet term hi a zawh tak avangin, president thar atan Bhaichung Bhutia chu thlan a ni tih executive thuchhuah chuan a tarlang.

Bhutia pawhin HSP President atana thlan a ni chu a pawm thu sawiin, an party hmasawn zelna tura a hmathlir neihte a sawi nghal bawk. "Sikkim mipuite tan kan thawk chhunzawm zel ang a, an beiseina siamtu kan ni ang. Sikkim mitinte lungrual taka an thawhho theihna turte siamin, kan state-in theihna a neih hrang hrang hi kan haichhuak ngei ang," a ti.

HSP general secretary Biraj Adhikari pawhin Bhaichung Bhutia kaihhruaina hnuaiah Sikkim chu dik lo taka rorel mek sorkar kut aṭangin an la let dawn a, hmasawnna kawng an zawhpui dawn tih a sawi.