Hmarchhakah HIV+ 63,000 awm

National AIDS Control Organisation (NACO)-in a tarlan dan chuan hmarchhak state pariat-ah Human Immunodeficiency Virus (HIV+) vei mi 63,000 an awm mek.

NACO hian kar kalta Nilaini khan Meghalya khawpui Shillong-a State Convention Centre-ah North East Regional Review meeting a buatsaih a, he hunah hian report tlangzarh a ni. Tarlan dan chuan India ram pumah HIV+ mi nuai 21.17 an awm mek a, heng zinga 6.54% chu kum 15 hnuai lam niin, 40.5% chu hmeichhia an ni. Kum 2015-a report tihchhuah tharah hian a vei zat hi tlakhniam lam pan loin, an pun belh zel tih a lang. Mihring awm zat aṭanga chawhrualin hmarchhak state Manipur chu HIV+ vei tamna ber niin, ram chhunga a vei awm zat 1.15% lai a ni. Hetih lai hian Mizoram (0.80) chuan Manipur a dawt a, Nagaland chu pathumnaah awmin, a vei zawng zawng aṭanga tehin 0.78% lai a tling bawk.

Kum 2001-03-a NACO-in report a tihchhuahah a vei an pung chak hle tih tarlan a ni a, hei hi 2015-a report ah khan 0.38%-in a tlahniam a ni. Andhra Pradesh & Telangana, Karnataka, Maharashtra, Manipur, Nagaland, Tamil Nadu, Goa, Odisha leh West Bengal state-ahte chuan HIV vei hi an tlahniam a ni. Hetihlai hian Bihar, Chhattis­garh, Gujarat, Mizoram, Rajasthan leh Uttar Pradesh state-ah chuan HIV vei hi an pung thung a ni.

Assam, Chandigarh, Delhi, Jharkhand, Punjab, Tripura leh Uttarakhand-ahte chuan puitliang zingah a vei an punbelh bawk.

Shillong-a North East Regional Review meeting buatsaih hi Ministry of Health and Director General, NACO, Sanjeeva Kumar, chuan a hmanpui a ni.