MDS scam hi min tihhmingchhiat tumna mai a ni : Ibobi Singh

Manipur Chief Minister Okram Ibobi Singh chuan Manipur Development Society (MDS) sum tichingpena puh a, a lakah FIR an thehlut chu amah tichhiat an tumna mai a nih thu sawiin, thu belhchian dawl lo a ni, a ti.

Ibobi Singh hi New Delhi aṭangin Imphal-ah nimin khan a let a, thuthar thehdarhtuten an kawmnaah a laka thubuai thehluh chu amah tihmualpho tum­na mai a nih thu a sawi. Congress MLA N. Loken chuan MDS hnuaia sum tihchingpen chung­changa an paty hruaitu Ibobi Singh-a hming lamrik tel a nih chu an hriathiam loh thu leh, politics-a intih­hmingchhiat tumna a nih thu a sawi. Hetih rual hian an puhna lakah hian a fihlim ngei a ni tih finfiahin a awm thuai dawn a ni, a ti. BJP kaihhruai sorkar bei zuiin, kumin March 15 aṭanga thuneihna an chan hnuah mipuite hamṭhatna tur eng thil mah la ti lo leh, Congress sorkarin scheme hrang hrang a lo kalpui tawh te an hming thlak ringawtah a puh. Tuna Ibobi Singh-a lakah thubuai thehluh a nih chungchangah pawh hian BJP chu a bultumtu ngei niin a sawi bawk.

Manipur Chief Minister hlui lakah hian kar kalta Zirtawpni khan Imphal police station-ah thubuai thehluh a ni a, a rual hian bureaucrat mi panga te lakah pawh thubuai hi thehluh a ni. An vai hian MDS hnuaia cheng vaibelchhe 185 tihchingpen chung­changah mawhphurtu leh inhnamhnawihah puh an ni.

CM hlui Ibobi Singh-a chief secretary hlui pathum - Y Ningthem Singh, P C Lawmkunga leh O Nabakishore Singh bakah, MDS-a project director hlui D S Poonia leh administrative officer Ranjit Singh-te lakah thubuai hi thehluh a ni, petition thehlut tu erawh tarlan a ni lo.