CPI-M-in CM Candidateatan Manik Sarkar ruat

Tripura-a rorellai Communist Party of India -Marxist (CPI-M) chuan nakkuma general assembly election an hmachhawn turah chief minister nilai Manik Sarkar chu chief ministerial canddiate atan an ruat leh.

Tripura-ah hian February 2018 khian election hi neih a ni dawn a, party hrang hrangte chuan hnehna chan tumin hma an la leh mek. CPI-M chief ministerial candidate Sarkar (68) hi chief minister ni tawh zinga hriat hlawh ber te zinga mi niin, kum 19 chhung zet lalṭhuthleng a luah tawh a ni. CPI-M state Secretary Bijan Dhar chuan CM candidate atan an ruatna hi a pawm tawh tih a sawi a, hnehna chan leh ngei an inbeisei thu a sawi bawk. Sarkar hi CPI-M central committee member ni lai a ni a, central-ah pawh mite hriat hlawh tak a ni.

Tripura-ah hian CPI-M hian kum 1978 aṭang khan sorkarna an chang ṭan a, 1988 - 1992 chhung khan Congress party kaihhruai sorkar dingin, a bak zawng chu CPI-M leh a thurualpui party-te'n thuneihna an la chang zui zel a ni. Tun ṭumah erawh chuan central-a rorel lai BJP-in state hrang hrangah huang an zauh chak em avangin an hna a awlsam dawn lo niin a lang. Hmarchhak state lian leh mihring tamna ber Assam-ah chuan hun rei tak chhung thuneihna lo chang tawh Congress sorkarna chu kum 2016 khan paithlak a lo ni tawh. Hetiang bawk hian Congress lenna Manipur-ah pawh BJP-in party dang thawhpuiin a vawi khatna atan sorkar an siam. Hmarchhak state dang Arunachal Pardesh-ah pawh chief minister Nabam Tuki-a kaihhruai sorkar chu paihthlak niin, Congress party-a hel Pema Khandu-a hoten People's Party of Arunachal (PPA) sorkar an din zet hnuah BJP an zawm leh tak avangin, BJP sorkar a ding ve leh a ni.

Hetih rual hian CPI-M state Secretary Bijan Dhar chuan thuneihna chang chhunzawm leh turin an inring tawk tih a sawi a, CPI-M sorkar a ding leh dawn a ni, a ti.