Manipur-ah mihring hmanga sumdawng mi pathum man

Manipur police-te chuan kar kalta Zirtawpni khan mihring hmanga sumdawng mi pathum an man a, an zinga pahnih chu hmeichhia an ni.

Police-te chuan heng mi pathum te hian tribal hmeichhe pathum te chu Thailand lamah hralh an tum tih sawiin, an nangching ta tih an sawi. An mi man- Esther Lalpianmoi (32), Lalngalomi (32) leh an driver Lunkhosat Haokip (31) te chu human trafficking lamah mi thar an nih loh thu sawiin, khawvel hmun danga mite nen pawh inzawmna ṭha tak nei an nih thu an sawi. Hralh an tum hmeichhe pathum te hi Churachandpur district-a cheng, kum 19 - 27 inkar an ni a, chhungkaw rethei tak an nih hlawm thu an sawi.

Human trafficker-te hian mi pathum an kawlte hi Myanmar border-a awm Moreh an panpui laiin man an ni a, police custody-ah dah nghal an ni.

Churachandur district Superintendent of Police Rakesh Balwal chuan, an thu­dawn bawhzuiin anti-human trafficking unit-a women sub-inspector te chu an che chhuak nghal a, heng mite hi va nangchingin an man ta tih a sawi. Thu an zawh fiah hnuah heng mite hian an mi hren te hi Thailand lamah sex worker atan hralh an tum tih an inpuang a ni, a ti. Human trafficker-te hian chhungkaw reithei tak tak an bitum fo tih sawiin, an nu leh pa te chu bumin, an fate chu ram dangah hna hmuh sak an intiam a, an bum chhuak ṭhin a ni. Tuna mite pawh hi an nu leh pate chu trafficker-te hian cheng 10,000 ṭheuh an pe a, Moreh aṭanga an kir hnuah cheng 90,000 pek belh leh an tiam a ni, a ti bawk.

SP Rakesh Balwal chuan, nu leh pa te chuan an fate chu Thailand-a hnathawk tura kal tur anga an ngaih thu an sawi tih a sawi. Tun hi hetiang thil an tawn vawi khatna nih loh thu sawiin, mipuite chu fimkhur turin a chah. Manipur-ah hian mihring hmanga sumdawnna a hluar chho hle a, sumdawngte chuan Singapore, Thailand leh hmun dangah te an hralh ṭhin nia tarlan a ni.