Arunachal-ah hel dapchhuah beihpui thlak reng a ni - Army Chief

Army Chief General Bipin Rawat chuan Arunachal Pradesh-ah Naga hel - National Socialist Council of Nagaland - Khaplang (NSCN-K)-te dapchhuah hna chu thawh reng a nih thu a sawi.

General Bipin Rawat leh Union Minister of State for Mome Affairs Kiren Rijiju-te chuan Thawhṭani khan meeting an nei a, hel laka beihpui thlak chungchang an sawi dun a ni. General Bipin Rawat chuan,"Security force-te chuan NSCN-K te dapchhuah hna hi an thawk reng a, Myanmar ramri bul hnaiah nitin an thawkchhuak ṭhin a ni" a ti.

Arunachal Pradesh-a Long­ding district-ah Thawhṭannni khan security force leh Naga hel te hi an inkap a, hel pakhat kahhlum a ni a, sipai pakhatin hliam a tuar ve bawk. Inkahna hi Prime Minister Narendra Modi-a'n Myanmar tlawh tura a kal hma nia thleng a ni a, hemi denchhen hian helte hi an chen nia ngaih a ni. Modi hian September 5-7 chhung hian Myanmar a tlawh dawn a ni. Army chief chuan inkahna thlengah hian hel pakhat a thih bakah, midang pawh hliam tuar an awm thu a sawi a, hetih rual hian sipai lamah pawh hliam tuar an awm thu a sawi bawk. Inkahna hmunah hian AK-56 assault rifle leh a mu 200 vel hmuh a ni a, helte hi umzui an ni.

General Bipin Rawat chuan Myanmar border hmun hrang hrangah National Socialist Council of Nagaland - Khaplang te dapchhuah hna hi kalpui zel a nih tur thu a sawi a, vawi eng emaw zat pawikhawihna liantham an lo thlen tawh avangin nuai chimit turin tha thlah a thiang lo tih a sawi. Naga helte hian Manipur-a Chandel district-ah June 4, 2015 khan security force-te an lambun a, sipai 18 an thi a ni. Hei bakah hian inlambunna thleng lian thamah an inhnamhnawih fo bawk. Naga helte hi India-Myanmar border-ah an chetla ber a, India sorkar aṭanga inlakhran phutin an hel a ni. Myanmar-ah pawh Naga eng emaw zat an khawsa a, heng mite nena hmun khata awm a, mahnia ro inrel duhin hun rei tak chhung an rammu tawh a ni. Hetih lai hian sorkar laipui chuan kum 2015 khan Naga helte chu Framework Agreement a lo ziahpui tawh a, inbiak zuina awm mumal loh avangin inremna tluantling a la awm thei lo a ni.