Arunachal Pradesh Health Minister a thi

Arunachal Pradesh sorkara Health and Family Welfare minister ni lai Jomde Kena chu nimin khan Guwahati-a private hospital-ah kum 52 mi niin a thi. Minister Jomde Kena hi hun eng emaw chen enkawl a ni a, a natna erawh tarlan a ni lo. A nupui leh a fate paruk a kalsan a, an chhungkua hian Lower Siang district-a Gensi khuaah an cheng a ni. Jomde Kena hi kum 2004 khan a ṭum khatna atan Likabali constituency aṭangin MLA atan thlan tlin a ni a, he bial aṭang vek hian 2009 leh 2014 khan hnehn a chang leh bawk. Nabam Tuki-a kaih­hruai Congress sorkarah khan assembly deputy Speaker a ni hman a, Dorjee Khandu leh Jarbom Gamlin kaihhruai sorkarah Parliamentary Secretary a lo ni tawh ṭhin bawk.

A ruang hi nimin vek khan Guwahati aṭangin Naharlagun panpui a ni a, a pian leh sei lenna Gensi khuaah phum a ni ang. State sorkar chuan healh minister sun nan hian ni hnih chhung sorkar chawlh a puang a ni.

Chief Minister Pema Khandu chuan minister Jomde Kena-a thihna chuan a ṭhawng hle tih sawiin, a kalsan tak a nupui fanaute a tawrhpui thu a sawi. Khandu hi New Delhi-ah a zin a, a thih thu a hriat velah Kena-a kalsan tak a bial mipuite hnenah tawrhpuina thawn bawk.