Bengal-Sikkim face-off : Sikkim CM lem hal vangin Mamata Banerjee-i lem hal sak ve

Sikkim Chief Minister Pawan Chamling-a lem chuan­na poster chu West Bengal-a Siliguri-ah hal a ni a, hemi duh lohna lantir hian West Bengal Chief Minister Mamta Banerjee-i lem chuanna poster chu Sikkim-ah halsak ve a ni.

West Bangal sorkar chuan Sikkim CM Chamling-a chu an state aṭanga inlak hran phuta nawrh huaihawt mek, Gorkha Janmukti Morcha (GJM) presi­dent Bimal Gurung humah a puh a, na takin a sawisel. Bimal Gurung hi Bengal sorkar chuan man tumin a zawng mek a, a him theihna tura hma laah a ṭhenawm state Sikkim hi a puh a ni. Hemi avang hian state pahnih inkar boruak hi a ṭha lo hle a, ṭawngkamin an invau tawn a ni.

Tun hnai khan South Sikkim-ah GJM chuan general meeting an nei a, hemi ṭum hian West Bengal police-te chuan Sikkim hi panin, GJM mi leh sa eng emaw zat an man a ni. Hemi chungchangah hian Sikkim sorkar chuan thuchhuah siamin, Bengal police-te chu Sikkim sorkar hriattirna pe hmasa loah a puh. Bengal police-te hian lemchangin, khualzin angin Sikkim an rawn lut a, buaina an chawk chhuak zui a ni, a ti. He buaina chhuakah hian mi pakhat kahhlum a ni a, GJM activies 10 man an ni bawk.

He thil thleng hi Sikkim sorkar chuan a dem takzet thu a sawi a, an chet dan avang hian Bengal police-te lakah thubuai thehluh a ni bawk. Hetih lai hian Banerjee-i kaihhruai sorkar chuan hriattirna an pek thu leh dan ang thlapa Sikkim-a police tir a nih thu a sawi a, mahse hei hi Sikkim sorkar chuan a pha thung. Hetiang boruak a nih tak avang hian state pahnihte hi kawng hrang hrangin an inbei zui ta ni. Banerjee-i thlawptute chuan Sikkim CM lem chuanna poster-te chu an hal chiam a, Sikkim sorkarin GJM president a hum chu an dem thu an sawi. Hetihlai hian Chamling-a thlawptute chuan South Sikkim district-ah lungawi lohna an lantir a, Bengal police-te dan chu dan kalh a nih thu leh, an state himna tiderthawng thei a nih thu an au chhuahpui a, Chief Minister Banerjee-i lem an hal sak ve bawk.

Hei bakah hian GJM hruaitu Gurung-a a tlanchhuah theih nana kawng hawn saka Sikkim sorkar puhtu West Bengal Tourism Minister Gautam Deb-a lem pawh hal a ni. Gautam Deb-a hian Sik­kim sorkar chu Gurung-a himna tur ngaihtuah sakah puhin na takin a sawisel a ni. Sikkim Democratic Front(SDF) chuan Chamling-a lem hal a ni chu an dem takzet thu an lo sawi ve mek bawk.

Hetih lai hian Sikkim CM Pawan Chamling chuan GJM president Bimal Gurung (33) avanga an state-in harsatna a tawh chungchangah sorkar laipui chu inrawlh turin a phut a, an buaina chu chinfel thuai a nih loh chuan thil ṭha lo zawk a hringchhuak thei tih a sawi. Darjeeling buainain an state a kangkai chu pawi a tih thu sawiin, mipuite himna ngaihtuaha hma lak thuai a ṭul a ni, a ti. Hemi chungchang hi New Delhi-a North East Democratic Alliance (NEDA) conference-ah a sawi chhuak a ni. He hunah hian hmarchchhak state pariata chief minister pangte chu an tel a ni.

West Bengal sorkar chuan an state huamchhunga school zawng zawngah Bengali ṭawng zir tel vek turin thupek a chhuah a, hei hi Hill area-a chengte chuan duh loin lungawi lohna an nlantir. Heta ṭang hian buaina hi a irchhuak ṭan a, Darjeeling leh a chhehvel khua te chuan state sorkar thupek hi zawm duh lohin, Gorkhaland pek phutin sorkar an nawr zui a, kawng hrang hrangin lungawi lohna an lantir a ni. Nawrh huaihawtnaa buaina chhuakah mi eng emaw zat an thi tawh a, sorkar building pawh ṭhahnem tak tihchhiat a ni tawh. Sorkar laipui chuan buaina chingfel tur hian central para millitary force ṭhahnem tak a lo tir lut tawh a, mahse an buaina hian ziaawm lam a pan thei lo a ni.

Sikkim CM Pawan Chamling chuan GJM -te'n Gorkhaland an phut hi a thlawp thu a lo sawi tawh a, hei hi a ṭhenawm state West Bangal chuan a helh hle a, an inkar boruak pawh a chhiat chhoh phah a ni. West Bengal-a Siligur-ah hian Sikkim lirthei eng emaw zat chu suasam leh hal an lo ni tawh a, he thil thleng avang hian zin vei vak leh bung­raw phur lirthei ten harsatna nasa tak an tawk a ni. Sikkim sorkar chuan lirthei suasam leh beihna thleng avang hian state sorkar chuan cheng vaibelchhe tam tak a hloh tawh tih a sawi a, khualzin tangkhang an tam thu leh, khualzin ten thlen nana hotel an biak lawk tawh, cancel leh avanga sum hloh zat chu vaibelchhe 100 a chuang tawh tih a sawi.