Kawngchhia vangin Rel service 70 titawp
North East Frontier Railway (NEFR) chuan hmarchhak hmun hrang hrangah tuilianin rel kawng a tihchhiat avangin rel service 70 tihtawp a nih thu a tarlang.
Tuilian hi kum dang zawng aia a nasat avangin rel service titawp hun chhung pawh hi a rei tih NEFR chuan a tarlang a, ram chhung hmun hrang hrang pana tlan bungrua leh passenger phur rel 70 chu tihtawp a ngai hial a ni, a ti. Hetih lai hian August thla tawp lam aṭang khan bungraw phur rel te chu tlan
ṭan tir leh tawh an ni a, September 2 aṭang khan passenger train ṭhenkhat chu tlan ṭan tir an ni bawk. Heng zingah hian Delhi leh Kolkatapana tlan Rajdhani Express, North East Express, Kamrup Express leh Kolkata Express te pawh a tel. NERF official-te chuan heng bakah hian - Guwahati – Lokmanya Tilak Terminus - Guwahati Express, Naharlagun - New Delhi - Naharlagun AC Express, Agartala - Anand Vihar Terminus - Agartala Tripura Sundari Express, Dibrugarh - Kaniyakumari - Dibrugarh Vivek Express leh Kanchanjungha Express-te pawh ni rei lo te hnuah tlan tir theih an inbeisei thu an tarlang.
Hetih lai hian tuilianin rel kawng a tichhiat te chu ngawrh takin a siam hna thawh a ni a, September 15 hma chuan rel service hi dan pangngaia kalpui theih beisei a nih thu NERF chuan a tarlang.