Tripura electoral roll-ah Bru refugee 5,600 chuang thun tawh

Trpura-a Bru raltlan zinga 5,664 chuan resident registration document nei tawhin, electoral roll-ah thun an ni tawh tih official-te chuan an sawi.

Bru raltlan, an awmna hmun tura ruahmana inbengbelte chu Tripura permanent resident anga ngaih an ni tih an sawi bawk.

Tripura chief electoral officer (CEO) Gitte Kirankumar Dinkarrao chuan Bru raltlante hi an awmna tur khua ruahmanah an inbenbel hnuah register of resident (RoR) document an nei thei a, ROR an nei hnuah hian block development officer (BDO)-te chuan EPIC hi an pechhuak chauh ang, a ti. Mizoram aṭanga lut, Bru raltlan 14,000 vel chu Tripura voter list-ah hian dah luh a ni dawn tih a sawi.

Hetih lai hian Bru raltlante an awmna tur khuaa ruahmanna sawnfel tumna chu hun tiam chhunga zawhfel hman a nih dawn loh avangin sorkar laipui Tripura sorkar chu hun a pek belh. Kumin chhungin sawnfel vek hman tura tih ni mah se, harsatna hrang hrangte a awm avangin an tifel hman dawn lo a ni.

Thawhlehni khan Tripura chief minister Dr Manik Saha, union home minister Amit Shah leh official dangte chuan kum 2020-a Bru agreement ziah kalpui a nih dante an thlirho. Tripura sorkarin Bru raltlante tana a hmalakna hrang hrangte sawiho a ni. Ministry of home affairs (MHA) officer chuan Bru refugee hi chhungkaw 6,959, an vaiin mi 37,136 an awm a, heng zinga chhungkaw 3,696 chu an awmna tura ruatah an awm fel tawh a ni, a ti. Chhungkaw 2,407 tan in sak zawh a ni tawh a, a dangte awmna tur pawh sak mek a nih thu a sawi bawk.