Blue Whale Game: Assam-ah mi 12 chhanchhuak Police-te'n fimkhur turin mipuite chah

Assam Police-te chuan tun hnai khan online game hlauhawm tak Blue Whale Challenge khel ṭhin mi 12-te chu an nunna atana a hlauhawm hmain an chhanchhuak a, mipuite chu fimkhur turin an chah zui bawk.

Police-te chuan Blue Whale Challenge game khel ṭhin mi 12 zet chu a final stage an thlen hmain chhanchhuah an ni a, an rilru thlengin he game hian a thunun hman tih an sawi. He game avang hian Assam-a zirlai Sashikant Borha chu Pondicherry University-ah a lo intihlum tawh a, amah hi kum 20 mi niin, MBA zirlai a ni. He thil thlen hnu hian police-te chuan nu leh pate chu he game lakah an fate an him theihna tura hma la turin an lo ngen tawh a ni. Tunhnaia mi 12 zet chhanchhuah leh an nih tak avangin mipuite chu fimkhur leh zual turin an ngen a, hmun ṭhenkhatah awareness campaign an kalpui tawh bawk.

He game vanga ṭhalai te zinga harsatna thleng mek chungchang hi Asom Gana Parishad (AGP) MLA leh chief minister hlui Prafulla Kumar Mahanta chuan Nilaini khan Assembly inkhawmah a sawi chhuak a, state sorkar hmalak tum dan a zawt. Hei hi Parliamentary Affairs Minister Chandra Mohan Patowary chuan chhangin, he game khelh avanga harsatna tawk an awm zel lohna turin hmalak mek a ni a, nasa zawka beihpui thlak a nih tur thu a sawi. State chhunga internet service provider-te chu meeting neihpui an ni a, a darh zel loh nana hma la turin ngen an ni,a ti.

Minister Prafulla Kumar Mahanta chuan, Guwahati khawpui bikah chuan school leh college-te chu awareness campaign nei tura hriattir an nih thu sawiin, zirlai naupangte hnenah a ṭhat lohna leh, a hlauhawmna te inzirtir tura ngen an ni, a ti. Cyber security expert-te chuan tun hnai khan Don Bosco school-ah campaign hi an neih thu sawiin, zirlai 800 vel an tel tih a sawi bawk.

Police-te chuan Blue Whale Challenge hi Facebook leh WhatsApp bakah social media dangte hmanga khelh theih a ni lo a, mahse awlsam takin a link hi inthawn darh theih a nih thu an sawi. He game kheltute chu tih tur 50 tuk sak an ni a, zan laiah tih tur hausak tak tak te tuk sak niin, an hna chu a zo em tih report leh tur a ni bawk a, a tawpah intihhlum turin a ti bawk. Hei miin a khelh a, a atchilh tawh chuan rilru lamah harsatna neiin, ṭhiante zingah pawh an khawsa tam lo tih police-te chuan an sawi. He game kheltute hi inchhawng sang tak tak aṭang tein an zuang thla a, a ṭhen chu rel tlan laiah te an zuang lut a, kawng hrang hrangin mahni intihlum dan an ngaihtuah ṭhin a ni. He game avang hian khawvel pumah mi tam takin nunna an chan tawh a, India ramah pawh nunna chan hi pungchho zelin, hmarchhak state Assam-ah pawh nunna chan hi an awm tawh a ni.

Assam-ah hian he online game khel hi Guwahati, Nagaon district, Baksa district bakah Tezpur leh Dhemaji-ahte an tam thu tarlan a ni.