Assam tuilianin ziaawm lam pan zel

Assam-a tuilian chuan ziaawm lam a pan zel a, harsatna tawk pawh mi 40,000 vel chauh an awm tawh nia tarlan a ni.

Jorhat, Dhemaji, Lakhim­pur, Chirang, Morigaon, Na­gaon leh Cachar distrcit-a khaw 170 chuan tuilian hi an la tuar a, a hma angin a nasa tawh lo. Heti chung hian thlai chinna hmun ram hectare 6,000 vel chu tui hian a la chimpil a, ruah a sur belh tawh loh chuan harsatna hi a ziaawm chhoh zel beisei a nih thu, Assam State Disaster Management Authority chuan a tarlang. Assam-a lui lian ber leh, tuilian thlentu ber Brahmaputra lui chuan kam lam a pn tial tial a, hetih rual hian hmun ṭhenkhat chuan hlauhawm chhinchhiahna a la pel tho a ni.

Tun dinhmunah Nagaon district chu tuilian tuar tamna ber niin, mi 18,000 velin harsatna an tawk a, Dhemaji (13,600) leh Morigaon-ah 12,500 te an awm bawk. Relief camp tam zawk chu ṭhiah ni tawh mah se hmun ṭhenkhatah chuan camp-a khawsa eng emaw zat an la awm. Tun hnaiah nunna chan belh an awm loh bakah, hliam pawh an awm lo nia tarlan a ni. Hetih lai hian Assam-a hian kumin chhungin tuilian leh a kaihhnawih chhiatna hrang hrang thlengah mi 158 an thi tawh a, hliam tuar eng emaw zat an awm bawk. Ramsa leh nungcha ṭhahnem tak an thi tawh bawk.