Multi-Crore Scam : Manipur police-te'n an chhui ṭan
Manipur police-te chuan Manipur Development Society (MDS) hnuaia cheng vaibelchhe 185.79 tihchingpen nia ngaih chu an chhui ṭan.
MDS hnuaia sum tihchingpen chungchangah hian chief minister hlui Okram Ibobi Singh leh parliamentary secretary panga te lakah FIR thehluh a ni a, chhui zui mek a ni. Police-te chuan MDS project officer hlui Yambem Ningthem chenna-in an dapsak a, state vigilance commission chuan Ningthem-a chenna-inah hian document pawimawh eng emaw zat man a nih thu an sawi. District and sessions court chuan Ningthem-a bail dilna chu a lo hnawlsak tawh bawk. Hetih lai hian Nabakishore leh PC Lawmkunga-te chuan tih dik loh an neih loh thu an sawi. MDS hnuaiah hian Loktak Lake cheiṭhatna turin cheng vaibelchhe 185.79 pek chhuah a ni a, hei hi a hmanna tura hmang loa pawhpen nia sawi a ni.
Hetih lai hian Congress party chuan he thila an party hruaitu hlun Okram Ibobi Singh-a hming a lang tel chu party inbeihna a nih thu an sawi. Ibobi Singh-a hi MDS-ah hian chairman a ni ṭhin. Chief Minister N. Biren Singh chuan he thil hi politics-a hamṭhatna zawn nana hman a rem loh thu a sawi a, police-te thil chhui tibuai thei zawnga chet a rem loh thu a sawi bawk. State sorkar chuan he thila inhnamhnawiha puh offcial ṭhenkhat chu a suspend tawh bawk.