Assam sorkar leh Google-te'n MoU ziak

Assam sorkar leh Google India-te chuan Internet connectivity tihchakna turin inremna thuthlung, Memorandum of Understanding (MoU) chu Ningani khan an ziak.

Assam Chief Minister Sarbananda Sonowal chuan Google nen thawkdun tura inremna an ziak thei ta chu lawmawm a tih thu a sawi. Sonowal chuan MoU hi tihpuitlin tumin theihtawp chhuah a ni dawn a, state chhunga thingtlang khaw 26,000-ah internet connection pek tum a ni a, tea garden area-a khaw 1,500-ah internet connection hi pek tum a nih thu a sawi. Hei hian digital literacy-ah nasa taka hmasawnna a thlen dawn a ni, a ti. Chief minister chuan, technology lama hmasawnna chu ngaihpawimawh a ṭul thu sawiin, chu chu ram hmasawnna leh khawtlang nun chawisanna atana thil pawi­mawh a nih thu a sawi.

Assam CM chuan Google nen ṭang­kawpin kawng hrang hrangin hma an la zel dawn tih sawiin, Guwahati chu South-East Asian ramte nena inthlunzawmna kawnga natural gateway a nih theih nan hma lak a ni ang, a ti. State sorkar chuan technology lama hmasawnna turin programme hrang hrang a duang tih sawiin, hei hi state-in hmasawna kawng a zawh bulṭanna a ni, a ti. Hei bakah hian a kaihhruai sorkar chuan women empowerment, skill deve­lopment leh universal education-te chu a angaihpawimawh hmasak te an nih thu a sawi bawk.

Goodle India Country Head (Policy) Chetan Krishnaswami chuan India ram khawpui hrang hrangah internet connection a ṭha thawhkhat tawh hle tih sawiin, hmun kilkhawr leh hla zawkah te chak taka hma lak chhoh mek zel a ni, a ti. Hmarchhakin internet chak ṭha tak hman tur a neih theih nan huang zauh bel zel a ni dawn a, Assam chu a bulṭanna chauh a nih thu a sawi. Assam-a thingtlang khaw hrang hrangte chuan internet connection ṭha tak an neih hun chuan, khaw tinin hma an sawn ang a, state pawhin hma a sawn a beisei thu a sawi bawk.

State Information Technology Sec­retary Nitin Khare leh Goodle India Country Head (Policy) Chetan Krishna­swami-te chuan MoU-ah hian hming an ziak a ni.