Sikkim sorkar court-ah zualko dawn

Sikkim sorkar chu West Bengal Tourism Minister Gautem Deb thusawi danah a lungawi loh avangin court-ah a zualko dawn nia tarlan a ni.

Bengal minister Gautem Deb hian Sikkim sorkar chu Gorkha Janmukti Morcha (GJM) president Bimal Gurung humah a puh a, hemi chungchangah hian Sikkim sorkar chu a lawm lo hle tih Sikkimese Lawyer Yangzee Pinhasa chuan a sawi. Deb chuan GJM president himna turin Sikkim sorkar-in hma a la tih sawiin, man a nih lohna turin tlanchhuahna tur kawng a hawnsak a ni, a ti.

Bengal sorkar chuan tun hnai khan Sikkim-ah hian police eng emaw zat a tir lut a, GJM hruaitu mi 10 vel an man a ni. Bengal police-te hian hriattir lawkna awm loin an state an lut niin Sikkim sorkar chuan a sawi a, hei hi an state himna tiderthawng thei thil a nih avangin a lawm lo hle. He thil thlen hnu hian state pahnih inkar boruak a ṭha lo zui hle a, kawng hrang hrangin an inbei zui a ni. State pahnihte chief minister lem chuanna poster-te chu tun hnai khan hal a ni bawk.

West Bengal police-te hian South Sikkim district-a GJM meeting an chawkbuai a, inkahna thlengah mi pakhat a thi bawk. He thil thleng avang leh, nunna chan an awm avangin Sikkim police-te chuan Bengal police-te lakah thubuai an thehlut a, chhui chian mek a ni. Hetihrual hian social media lamah thudik tawk lo leh belchian dawl lo vawrhdarh a tam thu Sikkim police-te chuan an sawi a, mipuite chu fimkhur turin an chah a ni.