Manipur-a Muslim-te'n Deputy CM bang turin phut

Manipur-a Muslim-te chuan Deputy Chief Minister Yumnam Joy­kumar chu a fapa-in face­book-a an sakhaw sawi­chhiatna lam hawi a post avangin a nihna aṭanga bang turin an phut.

Deputy Chief Minister Yumnam Joykumar-a fapa Y. Debajit chuan Muslim-te'n an sakhaw thila an inhlan thiang­hlimna 'Qurbani' chu engmah lo mai a nih thu facbook-ah a tarlang nia sawi a ni a, hei hi Muslim-te chuan an duh lo hle a ni. Y. Debajit hian FB-ah hian, “Qurbani hminga ranvulh/ramsa talya an thisena inthawi hi engmah lo mai a ni a, mahni mihringpuite that tura inzirtirna tluk a ni" a ti. He thu a post avang hian Muslim-te rilru a na hle a, hemi duh lohna lantir hian Nilaini khan lungawi lohna an lantir a, mi ṭhahnem tak an pungkhawm a ni.

Manipur Muslim Wel­fare Organisation president Abdullah Pathan chuan, "Y. Debajit-a chetdan hi kan dem takzet a, sakhaw zalenna inrahbehsakna a ni a, a vanduai thlak hle a ni. He a thil tih avang hian a pa, Deputy Chief Minister Yumnam Joykumar hi bang turin kan phut a, darkar 48 chhungin banna a thehlut tur a ni" a ti. All Manipur Muslim Organisations Coordinating Committee president Mohammad Jalal pawhin, "Deputy CM Joykumar hian a fapa thil tihsualah mawhphurhna lain a bang tur a ni a, ban a nih theih nan hian chief minister hnenah memorandum pawh kan thehlut tawh a ni. Kan pawmzam mai dawn lo a, cyber crime unit-ah pawh thlen a ni tawh” a ti. Sorkarin an beisei anga hma a la lo a nih chuan na taka chet an tum thu a sawi bawk.

Hetih lai hian Debajit chuan a thil post avang hian thupha a la chawi lo a ni. Chief Minister N. Biren Singh chuan he thil hi a ngaih thutak hle tih Ninagni khan Imphal-a thuthar thehdarhtute hmaah a sawi a, thil tihloh tawp tur a ni, a ti. India ram chu sakhaw hrang hrang zuitute zalenna a nih angin sakhaw dang sawichhiat leh diriam hi a thiang lo a ni, a ti bawk.