India-China buaina hi Pakistan-in remchangah a la thei : Army chief

India Army chief General Bipin Rawat chuan India leh China inkara buaina awm mek hi ṭhenawm ram Pakistan chuan remchangah hmangin, India beih nana a hman theih thu a sawi.

General Bipin Rawat chuan, Sikkim-a India leh China sipaite inkar boruak ṭha lo chuan rah duhawm loh tak a chhuah theih thu sawiin, ram pahnih inkara buaina awm mek hi a punlun zel loh nan chinfel vat a ngai a ni, a ti. Ram pahnihte inkara buaina awm mek hi Pakistan chuan a hre reng a, hei hi remchangah lak a tum tih a sawi. Hemi a nih avang hian India chu a ṭhenawm ramte lakah a him theihnna tur leh, a ram chin a hloh lohna tura a inbuatsaih ṭhat hle a ngai a ni,a ti.

Hetihrual hian China chu India nek rana cheah puhin, zawi zawia India ram la hekah Army chief chuan a puh. China hian a bikin hmarchhak a zuam zual niin a sawi a, kawng hrang hranga buaina chawkchhuak ṭhin niin a sawi. Hei vang hian nasa taka ṭan lak a ngai a, a nih loh chuan ṭehnawm ramte chuan an nek na tulh tulh dawn niin a sawi. Hetih rual hian India chuan a ram humhim turin theihna a lantir a nih chuan buaina hi a reh thei zawk dawn tih a sawi bawk.

India-China leh Bhutan inrina Doklam-ah China sipaite chuan kawngpui siam hna an thawk a, hei hi Bhutan leh India chuan an duh lo hle. China sipaite hnathawh titawp tur hian India chuan sipai eng emaw zat a tirlut a, hun eng emaw chen chu an inep zui bawk. Inbiakna neih a nih hnuah ram pahnih te chuan an sipaite hnuhkir an remti nia tarlan a ni. Heti chung hian Army chief General Bipin Rawat chu a fimkhur hle a, Jammu and Kashmir-ah Pakistan sipaite'n inkahhaina an bawhchiat fo avangin, India chu ram pahnihte laka a him theih nana hma lak a ṭul thu hi a sawi a ni.