Rohingya Muslim-te dang turin Venhimna tihkhauh a ni : Manipur CM

Manipur Chief Minister N. Biren Singh chuan Rohingya Muslim-te India ramah an rawn luh belh zel lohna turin Ma­nipur-Myanmar Border-ah venhimna tihkhauh a nih thu a sawi.

Manipur Chief Minister Biren Singh chuan, tun hnaiah Rohingya Muslim-te'n India ram an rawn lut a, a bikin hmarchhak lam aṭangin an lut a ni. Hemi dang tur hian theihtawp chhuaha hma lak a ngai a ni, a ti. Hemi dang tur hian ruahmanna an siam thu sawiin, Manipur-Myanmar inkalpawhna kawngpui km 364 zeta thuiah venhimna khauh zawka kenkawh chhoh mek a ni. Myanmar-a Muslim-te hian dan loin India ram an rawn luh avangin man an ni a, jail-ah tan tir an ni, a ti. Biren Singh chuan Rohingya Muslim-te hi international border paltlangin ram dangah pawh an lo lut fo tawh tih sawiin, Bangladesh sorkarin an ramah luh a khapsak bawk avangin India ram an rawn hawi leh ṭan mek a, eng emaw zat chu an lut tawh a ni. Hemi dang tur hian hmarchhak state-te leh sorkar laipui ṭanrual a ngai a, anmahni dang tur hian theihtawp chhuah a hun a ni, a ti.

Superintendent of Police S. Ibomcha chuan, Rohingya Muslim-te dang tur hian beihpui thlak nghal a nih thu a sawi a, Myanmar ramri depah police leh paramilitary force-te chu chhun zan zawma an duty thu a sawi. Hetih rual hian Rohingya-te hian Manipur an la lut lo niin a sawi bawk.

Hetih lai hian Meitei Youth Front (MNF)-te chuan Rohingya Muslim eng emaw zat chu jail-ah khung an nih thu sawiin, chhuah tura an phut thu an sawi. Heng Muslim-te hi Myanmar-a Muslim-te nen an inang lo tih sawiin, refugee status pek an phut thu an sawi bawk.

United Nations (UN)-in a tarlan dan chuan Myanmar-a Rakhine-a tualchung buaina chhuak avanga Bangladesh-a Rohingya Muslim lutte chu kar kalta Inrinni thleng khan mi 29,000 an awm tawh. Hetih rual hian kawng laka chetsualna thleng hrang hrangah mi eng emaw zat an thi tawh a, a tam zawk chu tuia tlahlum an ni. Myanmar-a Rakhine tualchhung buaina hi police leh military force-te'n Rohingya hel an beih aṭanga inṭan a ni a, Myan­mar Army-te chu mawh­phurtu berah ngaih an ni bawk. Tualchhung buaina chhuak avanga thi hi mi 1,000 tling tawh niin, UN chuan a tarlang.

Hetih lai hian Rohingya Muslim-te hian Myanmar aṭangin hmarchhak state Assam an lut tawh bawk nia tarlan a ni. Official-te chuan tun hnai khan Rohingya Muslim eng emaw zat chuan Assam an lut a, an zinga mi 28 chu man an ni. Hetih rual hian Rohingya Muslim-te chenna turin Goalpara, Kokrajhar, Sibsagar, Dibrugarh, Jorhat leh Tezpur-ahte detention camp paruk siam a ni tawh a, heng hmunahte hian khawsak lailawk tir an ni. Offical-te chuan Assam-ah hian Rohingya Muslim 372 lut tawh a, Hindu pawh mi 163 lai an awm tawh bawk nia tarlan a ni bawk.