Okram Ibobi Singh-a'n eirua puhna pha

Manipur Chief Mi­nister hlui leh tuna opposition leader ni mek Okram Ibobi Singh chuan Manipur Development Society (MDS) hnuaia sum tam tak tihchingpen chungchangah inhnam­hnawihna a neih loh thu sawiin, eirua an puhna chu a pha.

Okram Ibobi Singh chuan MDS-a chairman a nih laiin, sum lakchhuahna tur cheque-ah a mimalin hming a ziak lo tih a sawi. MDS hnuaiah hian cheng vaibelchhe 158 vel tihchingpen nia tarlan a ni a, chief minister hlui Okram Ibobi Singh pawh inhnamhnawiha puh zingah hian a tel a ni. Hei bakah hian multi-crore Loktak scam-ah hian police belt leina tur sum cheng nuai 30 pawh chin hriat lohin a riral nia tarlan a ni bawk. MDS hnuaiah hian Loktak Lake cheiṭhat leh tihchangtlunna turin chengveibelchhe 158 vel ruahman a ni a, hei hi dik lo taka tihchingpen nia sawi a ni.

He thilah hian Okram Ibobi Singh bakah Congress sorkar hun laia hming langsar tak tak te pawh an hming lam rik a ni a, mi paruk lakah FIR thehluh a lo ni tawh. Ibobi Singh hi bail-a chhuah phalsak a ni a, midangte erawh chu bail theih an ni lo. An chungchang hi police-te chuan an chhui zui mek a ni. Ibobi Singh chuan midang panga te bail-a chhuah phalsak an ni lo chu pawi a tih thu sawi a, he thilah hian thiam loh chantir a nih chuan a hremna pawh a pawm thlap tur thu a sawi. Hetih rual hian hnuchhui hna chu fimkhur taka kalpui a ṭul thu sawiin, thudik hailan chu a duh ber a nih thu a sawi.

Hetih lai hian Congress party chuan Manipur Development Society hnuaia sum tihchingpen awm nia sawi a, Okram Ibobi Singh leh midang laka FIR thehluh a nih chungchangah BJP chu a bultumtuah puhin, party intihhmingchhiat tumna a nih thu an sawi.