Sikkim CM-in One World Award 2017-ah award dawng

One World Festival 2017 chu kar kalta Zir­tawpni khan Germa­ny-a Legau-ah neih a ni a, award hrang hrang sem a ni. He hunah hian Sikkim Chief Minister Pawan Chamling chu Organic Far­ming lama a hnathawh ṭhat avangin award hlan a ni.

One World Award hi kum thum danah sem ṭhin a ni a, Organic Farming lama hna thawk ṭha bik, khawvel hmun hrang hranga mi hnenah hlan ṭhin a ni. Kuminah hian India, Palestine, Azerbaijan, Zimbabwe, Ethiopia leh Germany ami ten an dawng a ni. Sikkim Chief Minister hnenah hian Grand Prix Award hlan a ni a, Organic State an nih theih nana a hmalakna te avangin he chawimawina hi hlan a ni. Award hi Federal Minister of Bavaria State Dr. Gerd Muller leh German Organic Pioneer and Managing Director of Rupenzel Joseph Wilhelm-te'n an hlan a ni.

Chamling chuan, "Organic State-a Sikkim puan a nih theih nan hma nasa takin kan la a, ka thawhpuite leh mipuite thlawpna avanga hlawhtling kan ni. Kan thlen chinah hian kan duh tawk mai dawn lo a, hma kan lak chhunzawm zel dawn a ni" a ti. Award a dawn chu an state mipuite tan a hlan thu a sawi bawk.

One World Award semna hunah hian khawvel hmun hrang hrang aṭangin mi 700 vel an tel a ni.