Manipur Hill-ah ‘People’s Day’ hmang

Manipur sorkarin mipui­ten awlsam zawka sorkar mi pawimawhte an dawr theih nana ‘People’s Day’ a hman ṭhin chu, Hill area-ah buatsaih leh a ni.

He hunah hian Chief Minister N Biren Singh chu a ṭhu a, Hill area-a chengte nen inkawmna hun an hmang a ni. State sorkar chuan thla tin ‘People’s Day’hi a buatsaih ṭhin a, ni10-ah Hill area chengte tan buatsaih ṭhin niin, ni 15-ah Hill leh Valley-a chengte tan buatsaih leh a ni ang. ‘People’s Day’-ah hian chawhma dar 10 aṭanga tlai dar li thleng mipuite tan hun hawn ṭhin a ni. Pathianni-a hun buatsaihah hian mi 400 velin chief minister an dawr hman a, complain 173 a lut a ni.

Chief Minister Biren chuan Hill area-a chengte nen hun hlimawm tak an hman thu a sawi a, mipuiten an harsatna leh mamawh hrang hrang an thlen te chu bawhzui a nih tur thu a sawi. Infrastructure tichangtlung turin theihtawp an chhuah dawn tih sawiin, district hrang hranga school building-te chu cheiṭhat tura ruahman a ni a, market leh vantlang hmun te cheiṭhat chhoh zel a nih tur thu a sawi. Hei bakah hian inkalpawhna kawngpui ṭha nei turin hma lak zel a nih tur thu a sawi. Hetih lai hian school ṭhenkhata inthiarna hmun mumal lo tak tak a hmuhte chuan a tilawm lo hle tih a sawi a, Principal Secretary (School Education) chu mipa leh hmeichhiate tana inthiarna hran mumal tak an neih theih nana hma la turin a ngen thu an sawi.

Biren Singh chuan Manipur Public Service Commission (MPSC) hnuaiah doctor 200 lak thar tum a nih thu a sawi bawk.