Tripura : CPI-M-te'n MGNREGA sum tihtlem duh lohna lantir dawn

Tripura-a rorel lai Communist Party of India-Marxist (CPI-M) chuan Mahatma Gandhi National Rural Employment Guarantee Act (MGNREGA) scheme hnuaia sum an dawn ṭhin tihtlem duh lohna lantirin lungawi lohna an lantir dawn.

CPI-M bultumin September 14 hian state pumah MGNREGA fund tihtlm duh lohna hi lantir a ni ang. State CPI-M Secretary Bijan Dhar chuan state sorkarin MGNREGA hi a kalpui ṭhat thu sawiin, kum khat chhungin ni 85-90 inhlawhna buatsaih ṭhin a ni. Mahse sorkar laipuiin he scheme hnuia state sorkarin sum a dawn tur a tihtlam dawn taka vang hian kum khatah ni 40 vel bakah inhlawhna buatsaih theih a ni dawn lo a ni, a ti. Hetihrual hian sorkar laipuiin he scheme atana kum 2016-17 chhunga sum a pek chhuah tur tun thlenga tikhawtlai a la ni chu pawi a tih thu a sawi.

Bijan Dhar chuan sorkar laipui flagship programme MGNREGA chu hmasawnna atana schme pawimawh tak a nih thu sawiin, hmarchhak state hrang hrangten an ṭanghkaipui thu a sawi. A bikin thingtlang leh hmun kilkhawr zawka awmten an chhawr ṭangkai thu sawiin, he scheme hnuaia sum an hmuh ṭhin tihtlem a ni chu an hrethiam lo takzet tih a sawi. A bikin lo neiha eizawngten an chhawr nasat thu sawiin, an inhlawhna leh sum an hmuhna hnar ber pakhat a ni a, MGNREGA hnuaia ni 100 inhlawhna hmangin vantlang tan thil ṭha tam tak thawh a lo ni tawh a, chu chuan hmasawnna tam tak a thlen tawh a ni, a ti bawk.

CPI-M chuan MGNREGA scheme chu mi rethei zawkten an ṭangkaipui avangin, kum khat chhunga ni 100 inhlawhna siam ṭhin chu ni 200-ah tihpun an phut a, ni khat hlawh pawh Rs 300-ah tihsan an phut bawk. Hei bakah hian Tripura sorkar chu MGNREGA scheme kalpui ṭha ber zinga mi a nih thu an sawi.

MGNREGA hi Congress kaih­hruai United Progressive Alliance (UPA) sorkar chuan February 2006 khan a tlangzarh a, thingtlanga cheng chhungkaw khawsak harsa te tana inhlawhna tur leh, infrustructure, kawngpui leh tuilak tihhmasawnna tura duan a ni. Thingtlanga cheng chhungkaw pakhat tana kum khat chhunga ni 100 inhlawhna tura duan niin, ni khata hlawh tur zat bithliah chu Rs.161.87 a ni.