Manipur cabinet-in hmun ṭhenkhatah zu khapna dan hlih a remti

Manipur cabinet chuan an state-a zu khapna dan an hman mek chu hmun ṭhenkhatah hlih a remti a, hei hi zu aṭanga chhiah tam zawk an lakluh theihna atan leh, zu ṭha lo hluar zel tihtlemna atana ti an ni tih an sawi.

Zu khapna dan hman mek hi district headquarters zawng zawng bakah Imphal khawpui, tourist destination, khum 20 chin awmna hotel leh security force camp-ahte hlih a ni dawn tih tribal affairs and hills development minister Letpao Haokip chuan a sawi a ni. Hemi rual hian zu phurtute chuan thuneitute aṭanga phalna an lak a ngai thung ang.

Minister chuan zu khapna an hlih ṭhen aṭang hian kum khatah zu aṭanga chhiah an lakluh chu Rs vaibelchhe 600 a tling thei dawn niin a sawi.

Zu khapna dan an hman hnua zu ṭha lo hluar chho leh, zu ṭha lo in avanga mi tam tak hriselna a nghawng dante pawh cabinet meeting-ah hian an sawiho thu a tarlang.

Mipuite nawrna avangin Manipur sorkar hian zu khapna dan, Manipur Liquor Prohibition Act 1991 siamin, kum 2002 khan he dan hi siamṭhat leh a ni. Zu khapna dan hman mek hnuaiah state chhungah zu hralh, siam leh in te hi khap a ni. Mahse khapna dan hman a ni chungin an thunun hleithei chuang lo a, state chhungah zu lei tur a awm reng tho a ni.

State sorkar chuan Sekmai leh Andro khuaa an hnam tihdan phunga zu siamte chu state pawn lama thawnchhuah dan ngaihtuah a tum bawk. Tun hnaiah thawnchhuah tura zu an siam dante zirchiang turin Goa-ah cabinet sub-committee pawh a lo tir tawh a ni. Zu siam dan tur mumal tak siam a nih hunah Sekmai-a tualchhung zu siamte chu vodka aia ṭha zawk an ni thei dawn tih Minister chuan a sawi bawk.