Doklam stand-off : China-in Nathu La Pass chungchangah inbiakna neih inpeih

China chuan Doklam-a India leh China sipaite an inepna avanga a khar lailawk, Nathu La pass chu hawn a nih leh theih nana inbiakna neih a inpeih thu Thawhlehni khan a sawi.

Chinese Foreign Ministry thupuangtu Geng Shuang chuan, "Indian khualzin-te'n Kailash Mansarovar an panna kawngpui pawimawh tak Nathu La pass chu June thla laihawl aṭang khan khar lailawk a ni a, hei hi Doklam-a India leh China sipaite inep vang a ni. Mahse tunah chuan ram pahnihte inkar boruak a ṭhat chhoh leh tak avangin, China chu Nathu La pass hawn a nih leh theih nana India nena inbiakna nei turin a inpeih tawh a ni" a ti.

Kum 2015 khan China sorkar chuan Indian khualzinten Tibet-a Kailash Mansarovar an tlawh theihna turin Nathu La pass hi a hawng a, hei hi kawng awmsa Lipulekh pass aia a hnaih zawk avangin khualzinte tan a ṭangkai hle a ni. Hetih lai hian June thlaa China leh India sipaite an inep aṭang khan Nathu La pass hi China sorkar chuan a khar a, khualzin eng emaw zat chu Tibet-ah an tangkhang a ni. Geng chuan khualzinte harsatna suking tur hian China sorkar chuan inbiakna neih a, chinfel thuai a duh a ni, a ti.

Chinese Foreign Ministry thupuangtu chuan, India-China boundary-a western sector-ah hian Chinese President Xi Jinping leh Indian Prime Minister Narendra Modi-te chuan Indian khualzinte tana kawng hawnsak turin inremna an lo siam tawh a, hei hi hun eng emaw chen chu ṭha taka zawm a nih thu a sawi. Hetihrual hian India sipaiten dan loa ramri kan a, Doklam-a China sipaite hnathawk an dan avangin China chuan he inremna hi zah tak chungin a chhuchat ta a ni, a ti.

India-China-Bhutan tri-junction-ah hian ram pahnih sipaite hi thla hnih chhung zet an inep hman a, thla hmasa lawk khan an inrem thei chauh a ni. Indian Army-te chuan June 16 khan China People’s Liberation Army-te'n Doklam kawngpui an sial mek chu an dan sak a, heta ṭang hian buaina hi a irhchhuak ṭan a ni. He buaina hian khualzin eng emaw zat a nghawng nghal a, Nathu La pass khar a nih avangin mi tam tak chu Tibet-ah an tangkhang zui a ni. Ram pahnihte hi dan loa ramri kana cheah an inpuh tawn a, insaseng turin an invau tawn bawk. Thla hnih dawn an inep hnuah ram pahnihte chuan an sipaite hnuhkir an rem ti a, hemi hnu hian China sorkar chuan China chuan Nathu La pass hawn leh thuai a nih theih nan India chu inbiakna neihpui a duh thu a sawi leh ta a ni.