New Delhi-ah NEMSU-in nawrh huaihawt

North-East Minorities Students Union (NEMSU) member-te chuan Ningani khan New Delhi-a Jantar Mantar-ah nawrh an huaihawt a, kum 2019-a Assam-a National Register of Citizens (NRC)final list tihchhuaha hming chuangte chu national identity card pechhuak vek turin an phut.

NEMSU member-te hian darkar hnih vel nawrh hi an huaihawt a, an thil phut tarlanna thuziakte an keng. NRC list-a telh loh ten list-a tel tura an dilna pawh ngaihtuah sak thuai turin an phut bawk.

Zirlai pawl hian President, Prime Minister leh Union home ministry bakah ministry of minority affairs-ah memorandum an thehlut nghal bawk a, Assam-a NRC buaipui laia biometric data lakkhawm, an lock sakte pawh lock-na tihtawp a nih theihna atana hma la turin thuneitute an ngen bawk a ni. Data an lock sakte hian an Aadhaar card an hmang thei lo niin an sawi.

NEMSU memorandum-ah hian, "NRC buaipui a nih lai khan diltu nuai 27 chuangte biometric details chu lakkhawm a ni. Kum 2019, August 31-a Supplementary List tihchhuahah khan diltu zingah mi nuai 19 vel chu telh an ni lo bawk a ni. Mi nuai 27 chuangte biometric data hi lock vek niin, hei vang hian UIDAI pawhin an Aadhaar card hi a en thei lo a, Aadhaar card thar hi an dil thei bawk si lo a ni," tiin an tarlang.

Assam sorkarin state chhunga Islam chanchin zirna, madrassa a ṭhiahsak chu tihtawp tir turin sorkar laipui an ngen bawk a, hei hi minority-te dikna chanvo bawhchhiatna a ni, an ti. Hei bakah hian Assam sorkarin dan loa sorkar rama awm nia sawia a hnawhchhuahte chu an insawnna tur leh chhawmdawlna tur mumal engmah a ngaihtuah zui lo nia sawiin, hetianga che tawh lo tura state sorkar dang turin an ngen bawk a ni.