Indian Oil-in Assam State Zoo-a samak 2 enkawl belh

Indian Oil Corporation Ltd (IOCL) chuan Assam State Zoo-a samak pahnih chu an enkawl belh leh.

Indian Oil thupuangtu, Jayaswal Kuldip chuan oil company hian February thla khan zoo-a samak paruk chu an lo enkawl tawh tih a sawi. Ningani khan samak dang pahnih hi enkawl belh lehin sahuan enkawltute hnenah Rs nuai 2 cheque an hlan.

Kuldip chuan, "Assam chu khawvela samak awmkhawm tamna ber hmun niin, hetihlai hian heng ramsate hi sapeltuten an pel ṭhin vang leh, thlai chinna ram siam belh a nih avangin samak awm zat pawh hi an tlahniam hman a ni. Mahse sorkar leh pawl hrang hrang, Indian Oil angte hmalakna avangin hian an rawn pung chho leh a ni," a ti.

IOCL chairman SM Vaidya chuan environment leh ecology humhalh turin Indian Oil chuan a theih angin hma a la tih a sawi a, nikum September thla khan samak chu an mascot-ah an puang tih a sawi.

Tun hnaiah IOCL hian Tiger Conservation Authority (NTCA) nena thawk dunin, Namibia aṭangin 'cheetah' chu India ramah an lo lalut tawh bawk. Cheetah-te enkawlna tur hian kum nga chhungin Rs vbc 50.22 a pe dawn a ni.