Nagaland CM-in dan loa ILP endik ṭhin titawp turin hriattir

Nagaland chief minister Neiphiu Rio chuan dan loa zirlai pawl, NGO leh civil society organisation-ten Inner Line Permit (ILP) an lo endik ṭhin chu titawp turin district tin thuneitute a hrilh.

Nagaland Legislative Assembly session neih mekah, Ningania minister Temjen Imma Alang zawhna, zirlai pawl leh pawl dangte chu ILP endik turin sorkarin thuneihna a pe em tih chhangin, Chief Minister chuan sorkar lam thuneitu leh police-te tih tur a ni a, a bak eng pawl mahin an tih ve tur a ni lo tih a sawi.

Along chuan zirlai pawl hrang hrangin ILP an lo endik ve chhan zawt bawkin, Home Deparmtent chuan anmahniin an buaipui zo lo em ni, tiin a zawt leh bawk. Chief Minsiter chuan hetianga zirlai pawl leh pawl dangten ILP an lo endik ve hian a buaipuitu department leh officer-te hming a tichhe zawk niin a sawi bawk.

Deputy chief minister leh minister in-charge Home Y Patton chuan kumin January 1 aṭang khan Kohima-a commissioner office aṭangin ILP hi a thar 11,718 pek chhuah tawh niin, heng zinga 6,173 chu tourist ILP a ni tih a sawi. Kumin chhunga ILP peknawn leh hi 15,851 a awm bawk a ni.