Tripura-in private hospital-ah antigen test neih dawn

Tripura sorkar chuan an state-ah coronavirus kai an pun zel avangin state chhunga private hospital hrang hranga damlo enkawl mekte chu antigen test neihsak vek a tum. 

Health and family welfare director Dr Radha Debbarma chuan hemi chungchanga thuchhuah siamin, health institution hrang hrang, private nursing  home leh ILS  hospital-te pawh tiam vekin, damlo enkawl mekte chu Covid test neih sak vek an ni dawn tih a sawi a ni. Health department chuan private hospital leh nursing home-ahte antigen test kit hi a supply dawn a, dam lo te hi test neih sak vekin Rs 450 an chawi a ngai dawn thung a, an sum chawi hi National Health Mission (NHM) account-ah chhun luh zel a ni ang. 

Tripura-ah hian Covid-19 kai hmuh tawh hi 3,468 an tling tawh a, an zinga 2,033 chu dam leh tawhin, mi pakuain an thihpui tawh bawk. Hri kai mek hi mi  1,408 an la awm a ni.