Rohingya-te lakah Manipur sorkar fimkhur

Manipur sorkar chuan Myanmar-a Rohingya Muslim-te'n India rawn luh an tum nia tarlan a nih avangin venhimna khauh zawkin a kengkawh.

Police-te chu Myanmar ramri dep Hill district-ahte venhim hna thawk tura duty tir an ni a, ngawrh takin patrolling an nei a ni. Hetih rual hian tunkar Nilaini thleng kha chuan Manipur-ah hian Rohingya Muslim-te hi an la lut lo nia tarlan a ni. Ramri depa awm Moreh leh a chhehvelah pawh venhimna hi khauh taka kalpui a ni a, Myanmar-a Tamu khua chengte chu Moreh an tlawh phalsak ni mah se, tlai dar 4 hmaa an ram lama kir leh vek tura tih an ni.

Chief Minister N Biren Singh chuan Rohingya Muslim-te laka fimkhur a ṭul thu hi kar kalta Inrini khan a lo sawi tawh a, kawngpui hrang hrangah pawh uluk zawka venhimna kalpui turin a ti a ni. Biren chuan superintendent of police leh deputy commissioner-te pawh hriattirna pek an nih tawh thu a sawi bawk.

Myanmar-ah hian August aṭang khan Rohingya Muslim-te lakah Myanmar sorkar chuan beihpui a thlak a, he hi Rohingya helte chetna chhanletna nia ngaih a ni. Hetih lai hian sorkar chuan hel te chu an bitum ber a nih thu a sawi. Mahse Rakhine state-a Rohingya Muslim eng emaw zat chuan an ram chhuahsanin, himna zawngin an ṭhenawm ram hrang hrang an pan mek a ni. UN chuan Rohingya Muslim-te chungah zahngaihna lantir turin Myanmar ram leh a chhehvel ram te chu a lo ngen tawh bawk.