Nagaland-ah hri kai hmuh thar 54 awm

Nagaland-ah Nilaini khan hri kai hmuh chhuah mi 54 an awm belh leh a, an state puma hri kai hmuh tawh hi mi 1,084 an tling tawh. 

Health minister chuan a twitter-ah hri kai thar mi 57 an awm thu a tarlang a, mahse a hnuah health department chuan positive lai, test nawn result a tel thu sawiin, hri kai hmuh chhuah thar chu mi 54 zawk an nih thu an sawichiang leh a ni. 

Hri kai hmuh tawh mi 1,084 zinga 486 chu enkawl dam an ni tawh a, mi 598 enkawl mek an la ni. Hri la kai mek zinga 594 chu taksa lama harsatna nei lo, asymptomatic an ni a, hetihlai hian enkawl zinga pakhat, kum 82 mi chu a dinhmun a ṭha lo hle thung a, ICU-ah ventilator hmanga enkawl mek a ni.

Nagaland-ah hian RT-PCR hmangin sample 19,833 test a ni tawh a, Truenat khawl hmangin sample 13,058 test a ni tawh bawk. Nilaini khan Nagaland-a Dimapur quarantine center-a awm lai, hmeichhe kum 32 mi chu a room-ah thiin hmuh a ni. Ruang an chhar hi Thawhlehnia Assam aṭanga haw a ni a, pain quarantine centre-ah a awm zui a ni. A ruang hi postmortem tura lak a ni.