Assam sorkarin nu leh pa ngaihsaklote Hlawh cut sak dawn

Assam sorkar chuan sorkar hnathawkte chu kum upa tawh an nu leh pa leh, rualbanlohna nei an unaute an enkawl duh lo a nih chuan an thla hlawh chu 10% - 15% thleng a cut sak ṭhin dawn.

Kar kalta Zirtawpni khan Assam assembly chuan Assam Employees' Parents Responsibility and Norms for Accountability and Monitoring Bill, 2017 a pass a ni. He bill hnuai­ah hian sorkar hnathawkte chu an nu leh pa, kum upa zawkte chu enkawl a, an unau rualbanlote pawh enkawl tura tih an ni a, an mawhphurhna hi an hlen lo a nih chuan a hlawh cut sak an ni dawn a ni.

Finance health and education minister Himanta Biswa Sarma chuan Assam Employees PRANAM bill hi sawifiahin, sorkar hnathawk nu leh pa leh a unau rualbanlote chuan in lamah ngaihsak leh enkawl an hlawh lo a nih chuan a thawhna department-ah complaint an thehlut thei tih a sawi. Complaint lut hi enfiah a nih hnuin, sorkar hnathawk chu a chhungte enkawlna kawnga a mawhphurhna hlen loa ngaih a nih chuan a hlawh chu cut sakin, a nu leh pa emaw, a unaute account-ah emaw a hlawh cut sak chu thun a ni ṭhin ang.

Minister chuan PRANAM Act chu kum upa zawkte an zahna lan­tirna a ni tih a sawi a, public sector undertakings (PSU) leh private company-a thawkte tan pawh hetiang bill hi siam a ni dawn tih a sawi.

Hetih lai hian eptu pawl Cong­ress chuan bill hi sawiselin, Assam society hmusitna leh sorkar hnathawkte mimal leh chhungkaw nunah inrawlhna a ni, a ti. Congress MLA leh chief minister hlui Tarun Gogoi chuan Assamese society-ah chuan hnathawktuin a nu leh pa leh unaute enkawl chu tihdanphung awmsa reng a ni, a ti.