Regional Connectivity Scheme kalpui nan Shillong Airport thlang

North Eastern Council (NEC) chuan Shillong Airport chu hmarchhaka Regional Connectivity scheme kalpuina turin Civil Aviation Ministry-in a thlan thu a puang.

NEC Official chuan Regional Connectivity scheme hi Civil Aviation Ministry hnuaia schem pakhat a nih thu sawiin, he scheme kalpuina tur hian hmar­chhak state aṭangin Airport pakhat thlan chhuah a ni, a ti. Ministry of Civil Aviation chuan hemi chungchangah hian high level meeting a ko a, hmarchhak state tin aiawhte an tel a ni. Regional Connectivity Scheme Hub atana thlan chhuah theih tur zingah hian Aizawl, Silchar, Dimapur leh Imphal Airport-te hming pawh chhawpchhuah a ni. He scheme hnuaiah hian Shillong Airport hi changtlung zawka cheibawl a ni ang a, Aizawl, Silchar, Dimapur leh Imphal Airport-te nen hian thlunzawm a nih tur thu, NEC secretary Ram Muivah chuan a sawi.

NEC secretary chuan Regio­nal Connectivity Scheme hi hmar­chhak state-te tan a ṭangkai hle dawn tih sawiin, Shillong - Aizawl, Shillong - Silchar, Shillong - Imphal, Shillong - Dimapur pawh service tir thuai tura hma lak nghal a ni ang. He scheme hi NEC sum hmangin kalpui a nih tur thu sawiin, March 2019 thleng kalpui chhin phawt a ni ang, a ti.

He scheme hnuaiah tho hian Alliance Air siam a ni dawn a, Arunachal-a Dibrugarh leh Pasighat Airport-te a thlunzawm ang a, hemi hnu hian Silchar, Imphal, Guwahati leh Dimapur-ahte huang zauh a nih tur thu Muivah chuan a sawi. Alliance Air hi Air India hnuaiah a awm dawn a, Assam - Kolkata pawh service tir tum a ni. NEC secretary chuan, Air line lama hmasawnna chu hmarchhakin hmasawnna tura rahbi pawimawh a zawhna a nih thu sawiin, AAA Aviation Private Limited te nen ṭangkawpin huang zauh zel tum a nih thu a sawi. Aviation Minsitry chuan Brazil aṭangin aircraft a lei dawn a, October 10-ah a lo thlen hman beisei a nih thu a sawi bawk.

Regional Connectivity scheme hi September 1 khan tlangzarh a ni a, private company leh Civil Aviation Ministry-te'n inremna an siam lawk theih loh vangin hun eng emaw chen tih khawtlai a ni. He scheme hnuaiha hian Barzil aṭangin aircraft chawkluh a ni dawn a, hemi atan hian cheng vaibelchhe 22 pawh pek chhuah a ni tawh. NEC chuan kuminah cheng vaibelchhe 12 vel a seng dawn nia tarlan a ni bawk.