Priyanka Chopra-in Sikkim sorkar lakah ngaihdam dil

Actor Priyanka Chopra chuan Sikkim chu rawlrala chet hluarna hmun, politics kalphung pawh mumal lohna leh film industry-ah pawh hnufual tak anga a sawi chungchangah ngaihdam a dil.

Priyanka Chopra chuan, "Toronto International Film Festival-a interview-naa Sikkim chungchang ka sawi dan avang khan ngaihdam ka dil a, Sikkim mipuite chu min ngaidam turin ka ngen che u a ni" a ti. Interview a neih ṭuma a thusawi chu a tum loh lam daiha kaihlek a nih thu sawiin, Sikkim chu China nena inri a nih avanga hmun ralmuang lo a nih thu a sawi tumna zawk a nih thu a sawi. "Sikkim chu hmun hring nuam, a mi chengte pawh nelawm tak an ni" tiin, a thusawi dan avanga mipuite rilru a lo tihnatnaah thupah sawi.

Bollywood actress Chopra hian Sikkimese film “Pahuna : The Little Visitors” a siam a, he film hi Canada-a Toronto International Film Festival (TIFF)-ah chhuah a ni. He festival-a interview a neih ṭum hian, Sikkim chu India rama state te tak te, hel chet hluarna hmun leh politics kalphung pawh mumal lo, film industry-ah a la hniam thu te, “Pahuna: The Little Visitors” chu film puitling tak an tihchhuah awmchhun niin a sawi a ni.

A thusawi avang hian Sikkim sorkar a lawm lo hle a, state MP Prem Das Rai chu hemi chungchangah hian a ṭawngchhuak hial a ni.

He a thusawi avang hian Sikkim MP Prem Das Rai chuan Chopra hi a khak a, a thusawi chu thil hriatchian tawk loh vang a ni, a ti. An state chu engtik lai maha rawlrala chet hluarna hmun a ni ngai lo tih sawiin, "Politically illiterate" tia a sawi pawh a pawm loh thu te, milar tam tak chuan India President hming pawh an hriat loh thu te a sawi a ni. Priyanka Chopra chu thil hrechiang tawk loah puhin, a thusawi avang hian ngaihdam dil turin a phut a, Sikkim mipuite rilru a tihnat avangin thupha a chawi ngei tur a ni tih a lo sawi tawh a ni.

“Pahuna: The Little Visitors” script­writer Biswatosh Sinha pawhin Chopra thusawi hi a pawm loh thu a lo sawi ve tawh bawk a, Sikkim chu India rama state ralmuang ber zinga mi a nih thu te a lo sawi tawh a ni.

Hemi chungchangah hian Sikkim sorkar chuan press conference a lo ko tawh bawk a, Tourism and Civil Avia­tion Secretary Chewang Zangpo, Cultu­ral Affairs and Heritage Department Secretary Yasoda Bhandari leh IPR Department Special Secretary Namrata Thapa-te chuan Chopra thusawi hi an ngai thutak hle tih an sawi a, ngaihdam dil tura an phut thu an sawi ve bawk. Chopra thu sawi chu an state hmel tibaltu a nih theih avngin, tourism lam thenga an tawrh phah theih thu an sawi a, Chopra hi lehkha an thawn tur thu an sawi bawk.