Assam sorkarin Cultural and Tourism Festival buatsaih dawn

Assam sorkar chuan kumin November thla hian ni thum awh tur Barak Cultural and Tourism festival a buatsaih dawn.

Chief Minister Sarba­nanda Sonowal chuan festival buatsaih a nih tur thu hi tun hnai khan a puang a, Barak lui hausakna leh hmasang aṭang tawha hmun pawimawh a nihna te phochhuah a nih tur thu a sawi. Barak valley chuan chanchin ngaihnawm tak tak a nei tih sawiin, 'Barak valley civilization' hun lai aṭanga tun hun thlenga a pawimawhna te tarlan lehna hun remchang buatsaih tur hian state sorkar chuan theihtawp a chhuah a ni, a ti.

Festival organizing committee chair­man Sonowal chuan, sorkar chuan Brah­maputra leh Barak valley-a chengte hmasawnna chu a ngaihpawimawh thu sawiin, a kianga chengte chawikan zel chu he festival buatsaih chhan pakhat a nih thu a sawi. Chief minister chuan he festival-ah hian culture, history, traditional, sport leh midang hip thei tur thil phochhuah a nih tur thu a sawi bawk. District pathum - Cachar, Karimganj leh Hailakandi-te chuan festival hi an thleng dawn a, ni thum chhung a awh dawn a ni.

Festival organizing committee mee­ting-ah hian Finance minister Himanta Biswa Sarma, Minister of Transport, Industry and Commerce Chandra Mohan Patowary, PWD Minister Parimal Suklabaidya, Chief Secretary VK Pipersenia, Barak Valley district MLA leh senior official eng emaw zat an tel a ni.