Stakeholder hrang hrangte rawn hnuah zu khapna hlih a ni : Manipur CM

Manipur chief minister N Biren Singh chuan tun hnaia state cabinet-in zu khapna dan hman mek, state chhung hmun ṭhenkhata hlih a rel chungchang sawifiahin, kum hnih chhung stakeholder hrang hrangte an biakrawn hnuah thutlukna hi siam a ni, a ti.

Zu khapna hlih chu anmahni duh thua siam mai an ni lo tih sawiin, state sorkarin committee a dinin zirchianna a neih aṭanga rawtna a siamte chu cabinet chuan ngun takin an sawiho a ni, a ti. State assembly session hmasaah pawh hemi chungchang hi sawiho a ni tawh bawk tih a sawi.

State puma zu khapna dan hman mek chu cabinet remtihna angin district headquarters zawng zawng bakah Imphal khawpui, tourist destination, khum 20 chin awmna hotel leh security force camp-ahte hlih a ni dawn tih tribal affairs and hills development minister Letpao Haokip chuan a lo sawi tawh a ni.

Zu khapna hlih ṭhen ni dawn mah se, heng hmunah hian zu zawrhna tur, a lei thei chin chungchangah dan siam a ni dawn tih sawiin, hnam ṭhenkhat chu an hnam tihdan phunga tel a nih avangin zu siamte an awm a, hengte khap sak ngawt an theih lo tih Chief Minister chuan a sawi.