Meghalaya : Thla 4 chhungin ruihhlo Rs vbc 18 hu man

Meghalaya-a director general of police (DGP) LR Bishnoi chuan Meghalaya state-ah thla li chhungin ruihhlo, cheng vaibelchhe 18 chuang hu man a ni a, mi 134 man an ni tel bawk tih a sawi.

Ruihhlo man zingah hian heroin kg 3.62, ganja kg 4,500, opium gm 150, khuh damdawi bur 145 leh metamphetamine tablet 11,902 a tel. Hei bakah hian motor 31, mobile phone 90 leh pawisa fai, cheng nuai 24.22 an man tih DGP chuan a sawi bawk. Ruihhlo tawlhtu mi 134 manin, thubuai 48 ziahluh a ni tawh bawk a ni.

DGP chuan ruihhlo neitua puh an man zingah hian Meghalaya state mi 123 awmin, a bak chu Assam, Manipur leh Arunachal Pradesh mite an ni tih a sawi.

Bishnoi chuan ruihhlo do beihpui thlaknaah state police, anti-narcotic task force leh an thawhpui dangte inpekna vanga ruihhlo tam tham tak man a ni chu lawmawm a tih thu a sawi a, hemi rual hian ruihhlo doin beihpui an thlak chhunzawm zel dawn tih a sawi. Hemi kawngah hian hmarchhak state danga police-te pawh thawhpui tura sawmin, ruihhlo hluar zel leh a tawlhruk ṭhin dang turin lungrual takin thawhho a ngai a ni, a ti.

Ruihhlo tawlhruknaa inhnamhnawiha puh, state police pali pawh man tel an ni tih DGP chuan a sawi a, an mi mante hi ruihhlo ngai an ni tih a sawi bawk. Hei vang hian an department chuan police zingah zu leh ruihtheihthil ti ṭhinte chu ruihhlo tawlhru ṭhinten sum hmanga an thlem mai a hlauhthawn ṭhin thu sawiin, heng mite tan hian qualified counsellor-te hmangin counselling session buatsaih dan an ngaihtuah mek tih a sawi bawk.

Thla li liam ta chhungin Meghalaya police-te hian bike ruk 141 an hmuchhuak a, bike rutu mi 61 manin, thubuai 90 ziahluh a ni bawk a ni.