Tripura-a BJP MLA-in banna a thehlut

Tripura-a rorellai, BJP MLA Burba Mohan Tripura chuan MLA a nihna aṭanga banna a thehlut a, regional party TIPRA a zawm.

MLA hlui bakah hian BJP senior leader, Assembly speaker hlui Garui Shankar Reang pawhin TIPRA a zawm ve bawk.

Kar liam ta Zirtawpni khan Burba Mohan Tripura hian banna lehkha hi thehlutin, a mimal thil vanga bang niin a sawi. A banna hi Assmebly speaker Ratan Chakraborty chuan a pawmsak nghal a ni.

MLA pakhat a ban leh tak avangin member 60 awmna, Tripura Assembly-ah hian MLA 58 an awm mek a ni. BJP hian MLA 35 neiin, a thawhpui IPFT-in pasarih a nei. Eptu pawl, CPI(M)-in MLA 15 leh Congress-in MLA pakhat an nei.