Rohingya Crisis : India-Myanmar Border-ah venhimna tikhauh

Myanmar-a Rakhine state-ah Rohingya Muslim-te'n beih an tawh avangin hmun hrang hrangah himna zawngin an tlanchhe mek a, hemi avang hian India-Myanmar Border-ah pawh venhimna tihkhauh a ni.

Hmarchhak state Arunachal Pradesh (520 km), Manipur (398 km), Nagaland (215 km) leh Mizoram (510 km)-te chuan Myanmar an ri a, heng state-ahte hian sorkar laipui hmalaknain venhimna khauh taka kalpui a ni. Hetih lai hian Assam Rifles leh Border Security Force (BSF) official-te chuan heng state-ahte hian Rohingya Muslim lut an la awm loh thu an sawi a, hetih rual hian ramri leh a chheh velah chhun zam zawma venhimna kalpui a nih thu an sawi.

Inspector General of Assam Rifles Major General Upendra Dwivedi chuan, India-Myanmar border-ah hian Assam Rifles company pariat dahbelh a ni tawh tih a sawi. Deputy Inspector General of 23 Sector Assam Rifles Brigadier M.S. Mokha chuan Mizoram-ah Rohingya-te an la lut lo tih sawiin, an luh lohna turin hma lak reng a ni, a ti. BSF official-te chuan Tripura state-ah pawh lut an la awm lo tih an tarlang bawk.

Tun hnai khan ramri-a venhimna tihkhauh dan tur ngaihtuah hian Aizawl-ah meeting neih a ni a, he hunah hian Assam Rifles, BSF, Central Reserve Police Force, state police leh inte­lligence agency offical-te an tel a ni. India leh Bangladesh inrina West Bengal (2,216 km), Tripura (856 km), Meghalaya (443 km), Mizoram (318 km) leh Assam (263 km)-ahte pawh venhimna hi khauh zawka kalpui a ni.

Hetih lai hian Jamiat Ulama-i-Hind, Tripura State unit chuan kar kalta Ningani khan Rohingya Muslim-te thlavang hauhna kawng zawh an huaihawt a, Itanagar khawpuiah mi eng emaw zat an pungkhawm a ni. Kawngzawhte chuan Myanmar State Counselor Aung San Suu Kyi chu Muslim-te himna tura hma la tura an phut thu te, Rohingya-te lakah beihpui thlak mek titawp tura an phut thu an auchhuahpui a ni.