Ibobi leh Congress party lakah UNC-te lungawi thei lo

Manipur-a Naga pawl hrang hrang inzawmkhawm, United Naga Council (UNC) chuan kar kalta Inrinni khan thuchhuah an siam a, chief minister hlui O Ibobi Singh leh Congress party chetdanah an lungawi theih loh thu an sawi a, Naga-te chenna-a ‘One-Day District Level Political Workers’ conference neih an tum pawh an remti lo tih an tarlang.

UNC chuan, "Ibobi Singh-a kaihhruai Congress sorkar hun lai khan Manipur-a Naga-te chuan harsatna nasa tak kan tawk a, kan mi leh sa eng emaw zatin nunna an chan a ni. Kha thil thleng khan engtikah mah kan theihnghih tawh dawn lo a, Ibobi Singh leh Congress party hi kan do zel dawn a ni" an ti. Congress sorkar khan hel pawl a khawi ngam a, chung mite chu Naga-te chungah rawng takin an che ṭhin niin an sawi a, an chunga thil thleng zozai kha pawmdam harsa an tih thu an sawi.

UNC-te chuan Congress party-in Naga area-a ‘One-Day District Level Political Workers’ conference buatsaih a tum chu an dem thu sawiin, engti kawng mahin an remti ngai dawn lo tih an sawi. An thil tum hi an kaltlangpui a, buaina a chhuak a nih pawhin O Ibobi Singh leh deputy chief minister hlui Gaikhangam-te chuan mawh an phur ang a, party mualphona a ni bawk ang tih an sawi.