NEEPCO-in Arunachal CM relief fund-ah nuai 50 hlan

North Eastern Elec­tric Power Corporation Limited (NEEPCO) chuan Arunachal Pardesh chief minister relief fund tan cheng naui 50 an hlan.

NEEPCO Director S Borgohain chuan corporate social respon­sibility (CSR) hnuaiah fund hi pek a nih thu sawiin, kar kalta Zir­tawpni khan Chief Mi­nister Pema Khandu hnenah an hlan tih a sawi. Khandu chuan NEEPCO-te hmalakna chu fakawm a tih thu sawiin, chhiatna hrang hrang thleng avanga chhawmdawl ngaite hnenah hlanchhawn a nih tur thu a sawi. Kuminah ruahtui tla a tam avangin chhiatna thleng a tam thu a sawi a, heng harsatna tawkte hian chhawmdawlna an mamawh takzet a ni, a ti.

NEEPCO hian Arunachal-ah hian power Megawatt 600 pe chhuak thei tur Kameng Hydro Electric Project leh MW 110 pechhuak thei tur Pare Hydro Electric Project an kalpui mek a ni. Project hi a hun takah zawh a nih theih nan hma lak mek a ni a, zawhfel thuai pawh beisei a nih thu tarlan a ni. Pare leh Kameng electric project bakah hian, NEEPCO chuan MW 405 pechhuak thei Ranganadi hydro electric project chu kum 2002 khan Lower Subansiri district-ah a lo hawng tawh bawk a ni.