AP CM-in Chakma-Hajong chungchangah ṭanrual duh

Arunachal Pradesh Chief Minister Pema Khandu chuan sorkar laipuiin Chakma-Hajong refugee-te citizenship pe tura thutluk-na a siam chungchangah ṭanrual a ṭul thu a sawi.

Union home ministry chuan tunhnai khan hmar­chhak hmun hrang hranga Chakma leh Hajong refugee-te chu India khua leh tui nihna pe turin thutlukna siam a, dodalna a nasa hle. Arunachal CM Khandu chuan refugee-te khua leh tui pek an nih chungchangah hian ṭanrual a ṭul thu sawin, Congresss party chu politics-a hamṭhatna atana hmang tawh lo tura a duh thu a sawi. Congress party chu vote duh vanga refugee-te hum leh vulh lianah puhin, hei hi bansan tawh tura a duh thu leh, ṭanrual a ngaih zawk thu a sawi.

Pema Khandu chuan Union home minister Rajnath Singh leh Union Minister of State for Home Kiren Rijiju-te hnenah Chakma-Hajong refugee-te khua leh tui nihna pek an duh loh thu hi a lo thlen tawh a, inunauna tichhe thei leh ram leilung fate hamṭhatna dal thei thil a nih thu a thlen. All Arunachal Pradesh Students’ Union (AAPSU) pawhin nasa takin an dodal a, vawiin hian an state pumah bandh huaihawt an tum. State sorkar thupuangtu Passang Dorjee Sona chuan AAPSU-te hmalakna hi sorkarin a thlawp thu a sawi a, bandh huaihawt pawh hi an zawm tur thu a sawi. Hetih rual hian political party-te chu ṭanrual a ngaih thu sawiin, hamṭhatna lo zawng lo tura an ngen thu a tarlang.

Chakma leh Hajong-te chungchangah hian Supreme Court-ah Special Leave Peti­tion thehluh a lo ni tah a, AAPSU pawh­in PIL hi tun hnia khan an thehlut ve leh a, mahse Court-ah tikhawtlai a la ni.