Sorkar laipuiin Proposal thehlut turin NEIGRIHMS ngen

Sorkar laipui chuan Shillong-a North Eastern Indira Gandhi Regional Institute of Health and Medical Sciences (NEIGRIHMS)-in air ambulance kalpui a tum chungchangah proposal thehlut turin a ngen.

NEIGRIHMS director Dr DM Thappa chuan air ambulance service tir turin ruahmanna siam mek a nih thu sawiin, hemi chungchanga an ruahmanna te hi sorkar laipui chuan thehlut turin a ngen tih a sawi. Dr DM Thappa chuan hmun kilkhawr zawk ami ten awlsam zawka NEIGRIHMS an pan theihna turin air ambulance dispensary system duan a nih thu a sawi. Hei hi dam lo emergency-a damdawi-in panpui ngaite tan a ṭangkai hle dawn tih sawiin, hmarchhak state-te nen pawh thawh ho zel tum a nih thu a sawi.

Director Dr DM Tha­ppa chuan Manipur, Mi­zo­ram, Arunachal Pra­desh, Nagaland leh Tripura-te nen inthlunzawm turin hma lak a nih thu a sawi. Meghalaya sorkar nen ṭangkawpin he hmalakna hi kalpui a nih thu sawiin, sorkar laipui pwhin he thil hi a ngaihven hle a ni, a ti. Air ambulance atan hian helicopter eng emaw zat mamawh a nih tur thu sawiin, medical facility ṭha tak tak hmanga thuam a ni dawn tih a sawi bawk.

NEIGRIHMS hi 1987 khan din a ni a, Atal Bihari Vajpayee-a Prime Minister a nih lai kum 2000 khan Institute of National Importance-ah puan a ni a, kum 2007 khan “Institution of Excellence” ah puan a ni leh a, Medical Institute zinga hetiang status pek hmasak ber leh awmchhun a ni. NEIGRIHMS hnuaiah hian cheng vaibelchhe 280 sengin, Regional Cancer Centre, Medical College Building, Hostel leh Nursing College-te sak belh a ni bawk.