Assam-a lawng che sualah mi 10 an thi

Assam-a Goalpara district-ah ruah leh rial nasa tak tla avangin lawngleng pali an chesual a, mi 10 an thi.

Tun hnaia ruah leh rial nasa tak tla avang hian Goalpara district-a Sabon luiah lawngleng pali an chesual a, mi 10 chu tuiah an tlahlum a ni. Mi 50 chuanna lawngleng pali chu rial tla hian nasa takin a nuai a, an chetsual phah ta a ni. Additional Deputy Commissioner (ADC) Nur Hussain chuan vanduaina thlenna hmun hi chhanchhuah hna thawktute chuan an pan nghal thu sawiin, ruang pakua chu lakchhuah nghal a nih thu a sawi a, ruang zawn hna hi State Disaster Response Fund (SDRF) chuan an thawk a ni. Nunna chan zingah hian naupang paruk an tel. State sorkar chuan nunna chan chhungte chu zángnadawmna pek an nih tur thu a puang.

Tun hnai khan Assam-ah hian ruah nasa takin a sur a, rial a tlak bawk avangin hmun eng emaw zatah chhiatna a thleng a ni. Guwahati-ah chuan thing tluin mi pakhat a delh hlum a, hliam tuar an awm bawk.