Assam CM leh Sadhguru lakah complaint thehlut

Assam chief minister Himanta Biswa Sarma leh spiritual leader Sadhguru-te chu Inrinni liam taa Kaziranga National Park-a jeep safari an neih chungchangah, dan bawhchhia nia sawiin police-ah complaint thehlut a ni.

CM Sarma, Sadhguru leh anmahni zuitute hian khaw thim hnuah jeep safari an nei a, hei hi wildlife protection law bawhchhiatna a ni tiin, Park bula khuaa cheng mi ṭhenkhat chuan Bokakhat police station-ah complaint hi an thehlut.

Police-te chuan hemi chungchang hi an chhui zui tur thu sawiin, KNP hi forest department hnuaia awm a nih avangin divisional forest officer pawh report pe tura hriattir a ni dawn tih an sawi.

KNP official pawhin chhui chian a ni dawn tih sawiin, hemi rual hian official programme chu ruahman lawk aiin hun hman reite a lo ni ṭhin a, chutiang thil a nih chuan dan bawhchhiaah puh theih an ni chiah lo a ni, a ti

Complaint thehluttute hi Park bula model village, Morongiyal leh Balija Adarsh-a cheng Soneswar Narah leh Praban Pegu an ni. Khaw thim hnua jeep safari neih a, motor headlight tihen chu Wildlife Protection Act, 1972 bawhchhiatna a nih thu an sawi. He jeep safari-a telte hi man an phut bakah, mipui hnenah ngaidam dil turin an phut bawk.

Narah leh Pegu chuan Park awmna bul khuaa chengte chuan Park humhalhna atan ṭha takin dan an zawm a, an ranvulh enkawlna thleng pawhin harsatna tawh phahin, Park himna atan an inpe niin an sawi. Hetihlaia VIP-te pawisa loa an awm chu enliam mai tur a ni lo, an ti. Hemi chungchang hi social media lamah sawizui a hlawh hle.

Inrinni kha khaw thim hnuah Sadhguru hian national park-ah a car hi khalhin, a bulah CM Sarma ṭhuin, motor hnung lamah hian VIP dangte an chuang bawk a, an zingah hian state tourism minister Jayanta Malla Baruah pawh a tel. Sarma hian an kalna hi video tawi hi a twitter-ah pawh a dah a ni.

CM Sarma chuan night safari an neih chungchangah dan an bawhchhe lo niin a sawi thung a, Wildlife warden chuan zan lamah kaltir turin phalna a pe thei vek a ni, a ti.

Kaziranga National Park website-ah chuan Park-a jeep leh elephant safari hi zing dar 8 - 10 inkar leh, chawhnu dar 2 - 4 inkarah chauh a theih tih an tarlang. Official leh staff-te tih loh chu park chhungah tlai dar 5 hnuah awm phal a ni lo, tiin an sawi.