Tripura-ah Covid-19 kai hmuh belh zel

Tripura-ah Border Security Force (BSF) sipai 13 chu Thawhlehni khan coronavirus an kai tih hriat belh leh a ni a, heng mite nen hian hri kai hmuh tawh hi mi 42 an tling tawh. 

Covid-19 kai zinga pahnih chu enkawl dam tawh niin, mi dang 40-te chu enkawl mek an ni. Hri kai enkawl laite hi BSF sipai leh an fate an ni a, civil mi zinga hri kai pakhat awm chu enkawl dam a ni tawh a ni. 

Chief minister Biplab Kumar Deb chuan hri kai hmuh belh zel ni mah se mipuite chu chiai phah lo turin a chah. State sorkar chuan hri laka mipuite himna turin theihtawp a chhuah zel dawn tih a sawi a, test pawh a tam thei ang ber neih an tum tih a sawi. 

Thawhlehnia hri kai hmuh tharte hi a hmaa hri kai lo hmuh tawhna, 138th batallion BSF unit awmna, Dhalai district-a Ambassa a awmte an ni. State nodal officer for Covid-19 Dr Deep Kumar Debbarma chuan BSF battalion headquarters chu Covid-19 care centre atan siam nghal a ni tih sawiin, he unit-a awmte pawh test vek tumin hma lak mek a ni, a ti.