AP-a AAPSU-te bandh haui-hawtah tharum thawhna thleng

Arunachal Pardesh-a zirlai pawl lian ber All Arunachal Pradesh Students’ Union (AAPSU) chuan sorkar lai­puiin Chakma leh Hajong-te citizenship pe tura thutlukna a siam duh lohna lantira bandh an huaihawtah tharum thawhna a thleng a, mi eng emaw zatin hliam an tuar.

AAPSU-te hian Thawhṭanni khan an state pum huapin bandh hi an huaihawt a, thlawp a hlawh ṭha hle. Hetih rual hian hmun tam takah buaina a chhuak a, lirthei eng emaw zat hal a ni. Police-te chuan Itanagar khawpuiah buaina hi a chhuak nasa hle tih sawiin, state transport bus chu hal a ni a, mimal lirthei eng emaw zat hal tel a nih thu an sawi. Buaina chhuak vang hian lirthei tlan pawh tihtawp nghal vek a ni a, zing lama lirthei chhuak lui te chu nawrh huaihawtte hian an suasam tih an sawi.

Itanagar bakah hian Nam­sai, Changlang leh district dang eng emaw zatah buaina chhuak report a awm bawk. Bandh huaihawt a nih avang hian sorkar office, zirna-in leh sumdawnna hmunte khar vek a ni. Hetih lai hian state transport bus ṭhenkhat chu zing lamah an tlan chhuak a, hei hi AAPSU-te chuan lo dangin buaina a chhuak zui ta a ni. AAPSU chuan bandh zah loa sorkar bus service tir a ni chu an dem thu an sawi a, bus hal a nih chhan pawh an hmalakna sorkarin a ngaihpawimawh tawk loh vang a nih thu an sawi. Buaina chhuak vang hian nunna chan an awm hriat a ni lo a, hliam erawh eng emaw zat an awm a ni.

Sorkar laipui chuan Su­preme Court thutlukna angin Arunachal Pradesh leh hmar­chhak state danga Chakma leh Hajong refugee-te chu khua leh tui nihna pek a remti a, hemi duh lohna lantir hian All Arunachal Pradesh Students’ Union-te chuan total bandh hi an huaihawt a ni. AAPSU-te hmalakna hi pawl hrang hrangte chuan an thlawp a ni.

Refugee-te citizenship pe tura thutlukna siam a nih chung­changah hian state sorkar pawh sorkar laipuiah a zualko a, Chief Minister Pema Khandu chuan Thawhṭanni khan Union Home Minister Rajnath Singh hnenah an pawm theih loh thu ziakin a thlen a ni. Union Minister Kiren Rijiju chuan Supreme Court (SC)-in Chakma-Hajong refugee-te citizenship pe tura hriattirna a lo chhuah tawh chu sorkar laipuiin ngaihtuah nawn leh turin Apex Court-ah hian a thlen leh dawn tih a sawi. Hetih lai hian Union Minister of State for Home Affairs Kiren Rijiju pawhin refugee-te hnena khua leh tui nihna pek hi pawm theih a ni loh avangin sorkar laipui chu Apext Court-ah a zualko dawn tih a lo sawi tawh a ni. Hemi chungchang hi Chief Minister Pema Khandu pawh a sawipui tawh thu sawiin, sut leh a nih theih nan theihtawp chhuaha hma an lak tur thu a sawi a ni.

Supreme Court chuan kum 2015 khan sorkar laipui chu thla thum chhunga Chakma leh Hajong-te khua leh tuiah puang turin a lo hriattir tawh a, hemi zulzui hian Home Ministry chuan refugee-te hi citizenship pe turin thutlukna a siam a ni. Hei hian dodal a tawk nasa hle a, All Arunachal Pradesh Students’ Union (AAPSU) chuan hemi duh lohna lantir hian bandh hi an huaihawt ta a ni.